2 снежня ў галерэі “Панарама” Нацыянальнай бібліятэкі Беларусі адбылося ўрачыстае адкрыццё выстаўкі “12+”.
Арганізатары мерапрыемства – Нацыянальная бібліятэка Беларусі і Міжнародная гільдыя жывапісцаў.
На выстаўцы дэманструюцца творчыя пошукі 12 майстроў сярэдняга пакалення, вядомых і ў нашай краіне, і па-за яе межамі. Работы Ягора Батальёнка, Аляксандра Грышкевіча, Аляксандра Забаўчыка, Фёдара Ястраба, Уладзіміра Кожуха, Васіля Касцючэнкі і іншых мастакоў выкананы ў розных жанрах жывапісу – пейзаж, асацыятыўныя палотны, міфалагічныя карціны. Творы мастакоў даюць магчымасць убачыць і ацаніць тыя працэсы, якія сёння прасочваюцца ў беларускім жывапісе.
Адкрыў вернісаж загадчык аддзела галерэйна-выставачнай дзейнасці Нацыянальнай бібліятэкі Беларусі, старшыня Міжнароднай гільдыі жывапісцаў Фёдар Ястраб. На мерапрыемстве выступілі беларускія мастакі Васіль Касцючэнка і Генадзь Драздоў.
Выстаўка будзе доўжыцца да 15 студзеня 2011 г. у галерэі “Панарама” (22-гі паверх, закрытая аглядная пляцоўка). З 3 снежня ўваход на выстаўку платны і адпавядае кошту наведвання агляднай пляцоўкі.