15 лістапада ў галерэі “Лабірынт” адбылося ўрачыстае адкрыццё выставы памяці вядомых мастакоў па тэкстылі Алы Непачаловіч, Уладзіміра Лісавенкі і Ларысы Густавай у рамках V Трыенале дэкаратыўнага мастацтва Беларускага саюза мастакоў “ДЭКАРТ-22”.
У экспазіцыі прадстаўлена каля 50 габеленаў і шпалер вядомых беларускіх мастакоў, якія пайшлі з жыцця ў мінулым годзе, але зрабілі надзвычайны ўнёсак у беларускае дэкаратыўнае мастацтва. Іх роля ў развіцці беларускай школы тэкстылю і габелена незабыўная.
Вядомы майстар класічнага беларускага габелена Ларыса Мікалаеўна Густава (1947–2021) належала да пакалення мастакоў-тэкстыльшчыкаў, выпускнікоў Беларускага дзяржаўнага тэатральна-мастацкага інстытута, з якім звязана адраджэнне нацыянальных традыцый ткацтва і тэхнікі габелена ў 1970–1980-х гадах – знакавым перыядзе для нашага мастацтва.
Адна з улюбёных тэм Ларысы Густавай – пейзаж з сімвалічнай трактоўкай прыроднага матыву, дэкаратыўным, умоўным малюнкам. Часта аснову кампазіцыі складалі звычайныя кветкі, травы, дрэвы, птушкі, жывёлы, але яны былі пададзены аўтарам адухоўлена і ідэалізавана. І ў манументальных, і ў камерных працах нязменнымі былі эмацыянальная інтанацыя, жыццесцвярджальны аптымізм і лірыка, якія раскрываюць пачуцці і думкі аўтара, яго жаданне ўвесці гледача ў творчы працэс суперажывання.
Выразныя, вобразныя творы Уладзіміра Іванавіча Лісавенкі (1959–2021) – рэльефныя, аб’ёмныя габелены з выкарыстаннем не толькі ткацтва, але і джынсавай тканіны (джута), з уключэннямі ў палатно рознафактурных нітак. Для мастака джынсы не толькі сімвал маладосці, але і фактурны матэрыял, больш чым проста вопратка. Аднойчы ён сказаў: “Джынсы – гэта для майго пакалення было ўсё. Я проста гэтыя старыя штаны запускаю ў вечнае жыццё. Сотні джынсаў сяброў, знаёмых і, вядома, свае, якія нясуць у сабе пэўную энергетыку, старыя джынсы, якія маглі стаць проста рыззём і быць выкінутыя, ператвараюцца ў габелены”.
Ала Іванаўна Непачаловіч (1951–2021) зрабіла неацэнны ўклад у дэкаратыўна-прыкладное мастацтва Беларусі. Шмат гадоў яна выкладала на кафедры народнай творчасці і рамёстваў Беларускага дзяржаўнага ўніверсітэта культуры і мастацтваў, была ўдастоена звання лаўрэата ІІ Нацыянальнай прэміі ў галіне выяўленчага мастацтва за свае тэкстыльныя кампазіцыі. Яе габеленамі ўпрыгожаны Палац Незалежнасці і Нацыянальная бібліятэка Беларусі, Гродзенскі драматычны тэатр і Магілёўскі абласны палац культуры. Яе творы захоўваюцца ў большасці буйных музеяў Беларусі і радуюць гледачоў у шматлікіх краінах свету – ад Венгрыі да Казахстана.
У адкрыцці экспазіцыі ўзялі ўдзел генеральны дырэктар Нацыянальнай бібліятэкі Беларусі Аксана Кніжнікава, першы намеснік старшыні Беларускага саюза мастакоў, мастацтвазнаўца Наталля Шаранговіч, старшыня секцыі тэкстылю Беларускага саюза мастакоў Вольга Раднікіна, беларуская мастачка па тэкстылі, сябра секцыі тэкстылю Беларускага саюза мастакоў Галіна Крываблоцкая, беларуская мастачка-керамістка, сябра секцыі дэкаратыўнага мастацтва Беларускага саюза мастакоў Наталля Яўглеўская, беларуская мастачка па тэкстылі, сябра секцыі тэкстылю Беларускага саюза мастакоў, лаўрэат Дзяржаўнай прэміі Рэспублікі Беларусь Валянціна Бартлава.
Работы прадстаўлены з асабістых калекцый сем’яў мастакоў і Нацыянальнага мастацкага музея.
Арганізатарамі выстаўкі выступілі Нацыянальная бібліятэка Беларусі сумесна з Беларускім саюзам мастакоў.
Выставачны праект будзе працаваць да 14 сакавіка 2023 года.
Дата яго заканчэння можа быць зменена.
Час работы выстаўкі адпавядае рэжыму работы бібліятэкі.
Уваход – па чытацкім білеце або білеце сацыякультурнага цэнтра.
Тэлефон для даведак: (8 017) 368 37 37.
Матэрыял пададзены аддзелам сувязей з грамадскасцю.