7 кастрычніка ў бібліятэцы адбылося ўрачыстае адкрыццё выстаўкі “Trans Atlantic Art Message”. Экспазіцыя прысвечана лідару Баліварыянскай рэвалюцыі камандантэ Уга Рафаэлю Чавесу Фрыясу і яго ўнёску ў развіццё брацкіх адносін Венесуэлы і Беларусі праз прызму творчасці вядомага беларускага мастака, удзельніка шматлікіх выставачных праектаў Беларусі і замежжа Алеся Родзіна.
Серыя “Венесуэла” стварае ўяўны вобраз краіны, вылучаецца шматузроўневым сінтэзам нацыянальных вобразаў-сімвалаў культур Венесуэлы і Беларусі. Адметны стыль мастака, яго характэрная тэхніка ліній і кропак, падрабязных фрагментаў раскрываюць сюжэты работ, прадстаўленых у экспазіцыі: сусветны скон-апакаліпсіс, міфалагемы, астралагічныя прылады, вобразы часу, агульнапланетарныя пытанні... Вялікая колькасць дэталяў, насычаных алегорыямі, прымушае пільна разглядаць працы, стварае таямніцу пранікнення ў сутнасць задуманага, у складаны космас асабістага аўтарскага светаадчування, які трэба “чытаць” і расшыфроўваць.
У мерапрыемстве прынялі ўдзел генеральны дырэктар Нацыянальнай бібліятэкі Беларусі Аксана Кніжнікава, Надзвычайны і Паўнамоцны Пасол Баліварыянскай Рэспублікі Венесуэла ў Рэспубліцы Беларусь Франклін Рамірэс Аракэ, мастак, жывапісец, член Беларускага саюза мастакоў Алесь Родзін, Спецыяльны пасланнік Прэзідэнта Баліварыянскай Рэспублікі Венесуэла, Пасол Баліварыянскай Рэспублікі Венесуэла ў Рэспубліцы Куба, прэзідэнт Навукова-даследчага інстытута па вывучэнні ідэйнай спадчыны Уга Чавеса Адан Чавес.
Пасольства Баліварыянскай Рэспублікі Венесуэла ў Рэспубліцы Беларусь выказала падзяку адміністрацыі Нацыянальнай бібліятэкі Беларусі за супрацоўніцтва ў рэалізацыі экспазіцыі “Trans Atlantic Art Message”.
Спецыяльны пасланнік Прэзідэнта Баліварыянскай Рэспублікі Венесуэла, Пасол Баліварыянскай Рэспублікі Венесуэла ў Рэспубліцы Куба Адан Чавес передаў у дар Нацыянальнай бібліятэцы Беларусі кнігі, выдадзеныя Навукова-даследчым інстытутам па вывучэнні ідэйнай спадчыны Уга Чавеса на іспанскай мове.
Добры настрой сустрэчы падтрымалі таленавітыя венесуэльскія музыкі Анхель Веласкес і Анджэла Кармон.
Праект “Trans Atlantic Art Message” пабуджае задумацца, узгадаць момант сустрэчы з самім сабой і падсвядомасцю, натхняе асэнсаваць каштоўнасць добрых узаемаадносін, мінулага вопыту і шчырасці. Мовай вобразаў мастацтва разбурае межы і ўзводзіць масты, ствараючы агульную прастору ўзаемаразумення.
Арганізатарамі выстаўкі выступілі Пасольства Баліварыянскай Рэспублікі Венесуэла ў Рэспубліцы Беларусь і Нацыянальная бібліятэка Беларусі.
Уваход – па чытацкім білеце або білеце сацыякультурнага цэнтра.
Экспазіцыя размешчана ў галерэі “Ракурс” (2-гі паверх) да 4 студзеня 2022 г.
Дата заканчэння яе працы можа быць зменена.
Тэлефон для даведак: (8 017) 368 37 37.
Матэрыял пададзены аддзелам сувязей з грамадскасцю.