З 13 кастрычніка ў бібліятэцы экспануецца выстаўка Івана Семілетава “Патаемнае жыццё рэчаў”.
Іван Семілетаў – беларускі мастак, удзельнік шматлікіх рэспубліканскіх і міжнародных выставак і праектаў. Работы аўтара знаходзяцца ў галерэях, музеях і калекцыях Беларусі, Аўстрыі, Італіі, Германіі, Партугаліі, Амерыкі і іншых краін.
На выстаўцы “Патаемнае жыццё рэчаў” прадстаўлена серыя работ, якія распавядаюць пра таямніцы жыцця звычайных прадметаў і механізмаў. Творчы погляд аўтара заўважае твары і выразы, сілуэты і постаці ў звычайных побытавых рэчах – і перадае гэтае бачанне праз жывапісныя сродкі. Побытавыя прыстасаванні сумуюць, імкнуцца збочыць у выкананні сваіх абавязкаў, здзіўляюць гледачоў вынаходкамі.
Прадмет выявы мастака незвычайны – пачуцці, перажыванні, жыццё рэчаў. Іншае бачанне аўтара, прызма ўяўлення – і ёсць шкельца, што трансфармуе рэчаіснасць і праз якое звычайныя ракавіна, ванны пакой, труба на маштабных палотнах Івана Семілетава становяцца жывымі асобамі.
Выстаўка будзе працаваць у галерэі “Панарама” (22-гі паверх) да 1 снежня 2020 г.
Дата яе заканчэння можа быць зменена.
Уваход складае кошт наведвання агляднай пляцоўкі.
Тэлефоны для даведак: (8 017) 266 37 37, 293 28 33.
E-mail: pr@nlb.by
Матэрыял пададзены аддзелам галерэйна-выставачнай дзейнасці.