22 мая ў мабільнай галерэі (3-ці паверх) адбылося ўрачыстае адкрыццё выстаўкі “Свет вачыма дзяцей”, прымеркаванай да Дня абароны дзяцей.
Экспазіцыя змясціла каля 25 твораў выхаванцаў ізастудыі “Васілёк”, якая працуе больш за 18 год у Мінскай абласной дзяржаўнай спецыяльнай агульнаадукацыйнай школе-інтэрнаце для дзяцей з парушэннем слыху.
“Мы сабраліся сёння тут з вельмі прыемнай нагоды – чарговы раз адкрыць для сябе творчасць дзяцей ізастудыі «Васілёк». Творы выхаванцаў студыі ўжо ведаюць у розных краінах свету”, – адзначыла пад час урачыстасці начальнік спецыяльнай адукацыі Міністэрства адукацыі Рэспублікі Беларусь Антаніна Змушко. Яна пажадала юнакам стаць паспяховымі людзьмі і мець усё больш і больш выставак у скарбонцы асабістых дасягненняў.
Юныя мастакі ізастудыі “Васілёк” бралі ўдзел у міжнародных выстаўках у Японіі, Германіі, Францыі, Расіі, іх творы экспанаваліся ў шматлікіх галерэях і музеях беларускай сталіцы.
Заняткі ў мастацкай студыі дапамагаюць вучням школы самарэалізавацца ў творчым плане, адчуць сябе здольнымі і таленавітымі. Удзельнікам студыі цяжка размаўляць з навакольным светам і таму яны выбіраюць мастацтва. Фарбамі яны расказваюць пра свой настрой, прыгажосць навакольнага асяроддзя і сэнс жыцця.
“Стала добрай традыцыяй штогод сустракацца ў Нацыянальнай бібліятэцы на выстаўцы мастацкіх твораў, выкананых навучэнцамі школы-інтэрната, зараджацца радасцю і дабрынёй гэтых карцін”, – распавяла дырэктар Мінскага абласнога цэнтра карэкцыйна-развіваючага навучання і рэабілітацыі Ніна Віктароўская.
Галоўная ідэя выстаўкі – нагадаць дарослым, што дзеці адчуваюць патрэбнасць у падтрымцы і клопаце пра іх. Грамадскасць павінна дапамагаць дзецям з абмежаванымі магчымасцямі і ствараць такія ўмовы, пры якіх дзеці могуць адчуваць сябе паўнавартаснымі асобамі і паспяхова рэалізоўваць свой творчы патэнцыял на карысць усім.
Выстаўка будзе працаваць да 20 жніўня 2014 г.
Тэлефоны для даведак: (8 017) 293 27 56, 293 78 33.
Е-mail: pr@nlb.by