15 чэрвеня ў бібліятэцы адбылося адкрыццё выстаўкі “Сучаснае мастацтва Пакістана”.
Выстаўка знаёміць з адметнай культурай, унікальнай спадчынай, старажытнымі традыцыямі ўсходняй краіны. Мастацтва Пакістана – складанае перапляценне самабытных культур, традыцый і звычаяў дзясяткаў народнасцей, якія насяляюць краіну, яе тысячагадовай гісторыі і смелых сучасных эксперыментаў.
У экспазіцыі прадстаўлены мастацкія работы выбітных пакістанскіх мастакоў. Каліграфія Аішы Камаль вылучаецца дзіўнай дэталёвасцю і дакладнасцю, у ёй паўстае карункавая прыгажосць і вытанчаная энергія жыцця, нараджаюцца сусветы колераў, адценняў, формаў, сімвалаў і метафар. Сайед Садэквайн – мастак і паэт, аўтар тысяч унікальных работ, прызнаных ва ўсім свеце. Яго складаныя мастацкія вобразы, сімфонія колераў, гармонія светлаценяў, прадуманая кампазіцыя, філасофскія тэмы, неардынарныя сюжэты ўражваюць пазачасавай актуальнасцю. Творы Нарын Саджыд характарызуюцца сімвалічнай і алегарычнай глыбінёй, яркімі колерамі, незвычайнасцю спалучэнняў, кантрастнасцю вобразаў. У здымках аднаго з лепшых фатографаў Пакістана Хаміда Хусэйна краіна паўстае ва ўсім сваім турыстычным харастве. Захапляльныя панарамы гарадоў і знакамітых горных вяршынь, азёрныя пейзажы, пешаходныя маршруты, архітэктурныя славутасці дазваляюць прывабіць гледачоў экзатычнай прыгажосцю Пакістана.
На адкрыцці выстаўкі выступілі намеснік генеральнага дырэктара Нацыянальнай бібліятэкі Беларусі Віктар Пшыбытка, Надзвычайны і Паўнамоцны Пасол Ісламскай Рэспублікі Пакістан у Рэспубліцы Беларусь Саджад Хайдэр Хан, начальнік галоўнага ўпраўлення Азіі, Афрыкі і Лацінскай Амерыкі Міністэрства замежных спраў Рэспублікі Беларусь Ігар Белы, мастак, каліграф, аўтар прадстаўленых у экспазіцыі работ Аіша Камаль.
Падчас свята адбылася ўрачыстая цырымонія перадачы ў дар Нацыянальнай бібліятэцы Беларусі каля 30 выданняў па гісторыі, традыцыях, рэлігіі, мастацтве Пакістана, а таксама мастацкай, дзіцячай і даведачнай літаратуры аб ўсходняй краіне. Прыемны падарунак зрабіў Надзвычайны і Паўнамоцны Пасол Ісламскай Рэспублікі Пакістан у Рэспубліцы Беларусь Саджад Хайдэр Хан.
Цёплую атмасферу мерапрыемства падтрымалі музычныя выступленні Ніны Пружаноўскай, Таццяны Крэміс і Уладзіславы Трошка.
Мерапрыемства адбылося ў межах святкавання 75-годдзя з Дня Незалежнасці Ісламскай Рэспублікі Пакістан.
Наведаць экспазіцыю, убачыць экзатычны Пакістан уяўна, адчуць яго каларыт, глыбіню, наватарства і вернасць традыцыям можна будзе ў галерэі “Атрыум” (3-ці паверх) да 6 ліпеня 2022 года.
Дата яе заканчэння можа быць зменена.
Уваход – па чытацкім білеце або білеце сацыякультурнага цэнтра.
Час работы выстаўкі адпавядае рэжыму работы бібліятэкі.
Тэлефон для даведак: (8 017) 368 37 37.
Матэрыял пададзены аддзелам сувязей з грамадскасцю.
