2009 год аб’яўлены ў Беларусі Годам роднай зямлі. У сувязі з гэтым 12 мая ў Нацыянальнай бібліятэцы Беларусі адбылося ўрачыстае адкрыццё праекта “Скарбы роднага краю: Ашмяншчына”.
Арганізатарамі мерапрыемства выступілі Нацыянальная бібліятэка Беларусі і адміністрацыя Ашмянскага раёна.
Гэты гісторыка-культурны праект стаў першым у ажыццяўленні маштабнай праграмы “Скарбы роднага краю”, мэтамі якой з’ўляюцца абуджэнне цікавасці да гісторыі канкрэтных рэгіёнаў Беларусі і прэзентацыя багатай, але недастаткова вядомай шырокім колам грамадства гісторыка-культурнай спадчыны.
Праграму мультыпраекта “Скарбы роднага краю: Ашмяншчына” склалі:
- выстаўка вырабаў дэкаратыўна-прыкладной творчасці;
- выстаўка жывапісу і дэкаратыўных пано ашмянскіх мастакоў;
- кніжная выстаўка “Ашмяншчына на карце Беларусі”, прадстаўленая Ашмянскай раённай цэнтральнай бібліятэкай;
- фотавыстаўка Тамары Філіповіч “Мой родны кут”;
- выстаўка жывапісу члена Беларускага саюза мастакоў Сяргея Шэмета “Пра Радзіму – з любоўю…”;
- фотавыстаўка Валерыя Дубоўскага – дырэктара выдавецтва “Юнипак”;
- прэзентацыя кнігі Крыштафа Дарагастайскага “Гиппика, или Книга о конях” выдавецтва “Юнипак”;
- інсталяцыя, звязаная з дзейнасцю коннаспартыўнага клуба “Гіпіка” з вёскі Грынцы Ашмянскага раёна.
Актыўны ўдзел у арганізацыі і правядзенні праекта прынялі прадпрыемствы раёна.
Ашмянскі раён мае вельмі багатую гісторыю, унікальныя архітэктурныя помнікі і гістарычныя аб’екты, тут актыўна развіваецца спорт і турызм. Гэты край даў Беларусі знакамітых мастакоў, паэтаў, вядомых грамадскіх дзеячаў і вучоных.
На адкрыцці праекта прысутнічалі кіраўнікі міністэрстваў і ведамстваў рэспублікі, вядомыя дзеячы культуры і мастацтва, прадстаўнікі навуковай грамадскасці і знакамітыя ўраджэнцы Ашмянскага раёна.