6 ліпеня ў галерэі “Лабірынт” (3-ці паверх) пачала работу выстаўка “Манумент”, якая праходзіць у межах Рэспубліканскага фестывалю манументальнага мастацтва.
На ўрачыстым адкрыцці з прывітальным словам выступіла генеральны дырэктар Нацыянальнай бібліятэкі Беларусі Аксана Кніжнікава. Сваімі меркаваннямі з публікай падзяліліся эксперты Беларускага саюза мастакоў: першы намеснік старшыні, мастацтвазнаўца Наталля Шаранговіч, старшыня секцыі манументальнага мастацтва, куратар рэспубліканскага фестывалю, мастак Васіль Зянько, член грамадскага аб’яднання, жывапісец-манументаліст Сямён Дамарад.
У экспазіцыі прадстаўлены віртуозна выкананыя, шматгранныя, лёгкія і дасканалыя работы Каміля Камала. Жывапісныя палотны майстра злучаюць рэалістычнае з незямным, колеры і контуры, сугучнае і супраціўнае. Краявіды, выкананыя Сямёнам Дамарадам, дакладна перадаюць настрой, надвор’е, стан наваколля: колеры навальнічнага неба, пах квітнеючага саду, сонечны бляск снегу, далікатную раннюю вясну і сціплую познюю восень. Гістарычны жывапіс, напоўненыя пачуццямі краявіды Алеся Сушы даўно сталі аўтарскімі прыкметамі мастака, па якіх яго пазнае глядач. Аўтар славіцца кранальнымі і незвычайнымі жаночымі вобразамі, у яго работах дзіўным чынам спалучаюцца цеплыня, дабрыня і рэдкая шчырасць.
Мастак чалавечых пачуццяў, Андрэй Скіцеў прадстаўляе работы, актуальныя ў любой краіне, тэму, нязменную праз стагоддзі, у часе і прасторы, зразумелую на любой мове. Пачуцці маюць адценні, упэўнены майстар, пасродкам шэрагу мастацкіх прыёмаў ён стварае маштабныя мапы ўнутранага падарожжа чалавека, яго вандровак у адносіны з іншымі. Адзін з найцікавейшых беларускіх сучасных мастакоў Сяргей Крыштаповіч – аўтар неакадэмічных работ, якія вылучаюцца складаным асацыятыўным шэрагам, шматслойнасцю ўспрымання, авангарднасцю, у якіх няма месца рэалізму, прадказальнасці, стандартам. Андрэй Кольга сумяшчае ў мастацкіх вобразах авангарднасць і цеплыню. Звычайныя прадметы і персанажы аталяюцца незвычайнымі колерамі, сюжэтамі, сэнсамі. Мясцовы каларыт і надзённая смеласць арганічна супрацоўнічаюць у жывапісу аўтара.
Пабываць у “Мідыйскам царстве”, пазнаёміцца з “Начным госцем” і “Райскімі птушкамі” і апынуцца “Неяк у лесе” ці ў “Восені ў вёсцы” можна на экспазіцыі “Манумент” да 21 лістапада 2021 года.
Дата заканчэння выстаўкі можа быць зменена.
Уваход – па чытацкім білеце або білеце сацыякультурнага цэнтра.
Тэлефон для даведак: (8 017) 368 37 37.
Матэрыял пададзены аддзелам сувязей з грамадскасцю.
