27 красавіка ў галерэі “Мабільная” (3-ці паверх) адкрылася выстаўка мастацкіх работ вучняў Гімназіі-каледжа мастацтваў імя І.В. Ахрэмчыка да 120-годдзя з дня нараджэння мастака.
Іван Восіпавіч Ахрэмчык (1903–1971) – беларускі жывапісец, народны мастак Беларусі, знакавая асоба для беларускай мастацкай адукацыі, прафесар, выкладчык шэрагу мастацкіх устаноў, настаўнік знакамітых айчынных аўтараў. Менавіта ён настойваў на стварэнні прафесійнай школы жывапісу – і ў 1962 годзе Рэспубліканская школа-інтэрнат па музыцы і выяўленчым мастацтве была адчынена, а ў 2005-м перайменавана ў Гімназію-каледж мастацтваў імя І.В. Ахрэмчыка. Іван Восіпавіч, яго вучні і прыхільнікі падрыхтавалі не адно пакаленне адказных настаўнікаў, верных класічнай школе беларускага жывапісу. Дзякуючы ім адораныя дзеці з усіх куткоў Беларусі здзяйсняюць свае першыя крокі ў творчасці.
Выстаўка "Прысвячэнне майстру" знаёміць гасцей з вынікамі пошуку і станаўлення мастацкага амплуа навучэнцаў гімназіі-каледжа 1970-х – 2020-х гг. У экспазіцыі прадстаўлены работы, прысвечаныя самым разнастайным тэмам – навучанню, пошуку прызначэння, успрыняццю рэчаіснасці, жыццю, гісторыі і культуры Беларусі. Юныя мастакі захоўваюць класічныя падыходы і разам з тым адпавядаюць сучасным тэндэнцыям у жывапісе і выяўленчым мастацтве, а значыць, справа Івана Восіпавіча Ахрэмчыка і памяць аб ім жывуць і сёння.
У мерапрыемстве прынялі ўдзел генеральны дырэктар Нацыянальнай бібліятэкі Беларусі Аксана Кніжнікава, намеснік дырэктара па вучэбнай рабоце Гімназіі-каледжа мастацтваў імя І.В. Ахрэмчыка, мастак, член Беларускага саюза мастакоў Пётр Багданаў, выкладчык гімназіі-каледжа, мастак, член Беларускага саюза мастакоў Уладзімір Клімушка.
Выстаўка будзе працаваць да 17 кастрычніка 2023 года.
Дата заканчэння яе працы можа быць зменена.
Час работы выстаўкі адпавядае рэжыму работы бібліятэкі.
Уваход – па чытацкім білеце або білеце сацыякультурнага цэнтра.
Тэлефон для даведак: (8 017) 368 37 37.
Матэрыял пададзены аддзелам сувязей з грамадскасцю.
