24 красавіка ў мабільнай галерэі Нацыянальнай бібліятэкі Беларусі адбылося ўрачыстае адкрыццё праекта “Хакей на вышэйшым узроўні”.
Мерапрыемства прымеркавана да чэмпіянату свету па хакеі з шайбай, што распачнецца ў Мінску ў маі. “Хакей у Беларусі даўно перастаў быць проста спортам – гэта ўжо рыса нацыянальнай самасвядомасці. У краіне паспяхова развіваецца дзіцячы і нават аматарскі хакей. Таму правядзенне чэмпіянату свету па хакеі ў Беларусі было марай як прафесіяналаў, так і простых людзей, улюбёных у гэты спорт”, – адзначыла пад час адкрыцця праекта загадчык сектарам арганізацыі кніжных выставак Нацыянальнай бібліятэкі Ірына Васільковіч.
Пад час урачыстасці госці сустрэліся з рэдактарам часопіса “Юниор. Футбол. Хоккей” Максімам Стаянам, пра хакей у прыкладным значэнні маладым удзельнікам мерапрыемства расказаў трэнер фізкультурна-аздараўленчага цэнтра Цэнтральнага раёна Юрый Вальчак. Асаблівасці прававога поля ў спартыўнай сферы асвяціла спецыяліст па развіццю кірунку “Спартыўнае права” рэдакцыі часопіса “Промышленно-торговое право” Таццяна Жураўлёва.
Праект “Хакей на вышэйшым узроўні” ўключае аднайменную кніжную экспазіцыю і фотавыстаўку «Нацыянальная зборная Беларусі па хакеі: мінулае і сучаснае».
Кніжна-ілюстрацыйная выстаўка “Хакей на вышэйшым узроўні” найлепшым чынам адлюстроўвае друкаваныя фонды бібліятэкі ў галіне аднаго з найпапулярнейшых відаў спорту і змяшчае каля 200 дакументаў аб сусветным, савецкім і беларускім хакеі: энцыклапедыі, слоўнікі, каталогі і даведнікі, календары, афішы, буклеты, навучальныя дапаможнікі, навукова-папулярную і біяграфічную літаратуру.
Фотавыстаўка падрыхтавана сумесна з асацыяцыяй “Федэрацыя хакея Рэспублікі Беларусь”. Экспазіцыя змяшчае каля 50 фотаздымкаў, якія збіраліся асацыяцыяй на працягу амаль 20 гадоў. На здымках зафіксаваны найбольш відовішчныя моманты сустрэч Нацыянальнай зборнай Беларусі са зборнымі іншых краін, адлюстраваны саставы Нацыянальнай зборнай нашай краіны па хакеі ў розныя гады, пачынаючы з сярэдзіны 90-х і да цяперашняга часу.
Выстаўкі працуюць да 31 мая 2014 года ў мабільнай галерэі на 3-м паверсе бібліятэкі.
Тэлефоны для даведак: (8 017) 293 27 56, 293 79 80.
Е-mail: pr@nlb.by