31 студзеня ў галерэі “Панарама” (22-гі паверх) адбылося адкрыццё фотавыстаўкі “Чырванаборскі край”. У экспазіцыі – плён работы Чырванаборскай школы фатаграфіі ў турыстычным комплексе “Чырвоны Бор” з 21 па 30 жніўня 2022 года.

Выстаўка знаёміць гледачоў з найбуйнейшым у Беларусі рэспубліканскім ландшафтным заказнікам “Чырвоны Бор”, яго пейзажамі, ляснымі экасістэмамі, рэдкімі раслінамі і жывёламі, занесенымі ў Чырвоную кнігу Рэспублікі Беларусь, а таксама з архітэктурнай спадчынай, якая захавалася на поўначы Верхнядзвінскага раёна.

Фатаграфіі кранаюць чароўнымі відамі ледавіковых азёр, рэк і ручаёў, балот, пагоркаў, лясоў і чорнаальшанікаў, адчуваннем вольнай прасторы і некранутай натуральнасці Чырванаборскага краю. Зорнае неба і возера Ізубрыца, туман над возерам Белае, рака Свольна з вышыні птушынага палёту здзіўляюць веліччу. Заварожваюць партрэты зуброў, зязюлі, зімародка, даўгахвостай кугакаўкі, дынамічныя і характарныя фота ласёў, аленяў, ланей і іншых жыхароў пушчы. А здымкі Успенскай царквы ў вёсцы Сар’я, руіны палацаў Гільзенаў і Шадурскіх у Асвеі, рэшткі званіцы царквы Еўфрасінні Полацкай у Росіцы нікога не пакінуць абыякавымі.

З прывітальным словам на адкрыцці выстаўкі выступіў намеснік генеральнага дырэктара Нацыянальнай бібліятэкі Беларусі Віктар Пшыбытка. Прадстаўнік Міністэрства адукацыі Рэспублікі Беларусь Анастасія Бядуліна расказала пра асаблівую каштоўнасць грандыёзнага сучаснага турыстычнага комплексу аднаго з найбуйнейшых прыродаахоўных аб’ектаў Беларусі і падзякавалі фотамастакам за актыўную дзейнасць, якая папулярызуе прыгажосць і непаўторнасць прыроды роднага краю.

Аўтар ідэі праекта “Чырванаборскі край”, дырэктар Рэспубліканскага фонду развіцця турызму і падтрымкі дзікай прыроды “Планета без межаў”, заснавальнік і дырэктар краязнаўчага выдавецтва “Рыфтур”, фотамастак Сяргей Плыткевіч распавёў пра асноўную мэту праекта і прадставіў яго ўдзельнікаў – педагогаў Валерыя Вядрэнку, Ірэну Гудзіеўскую, Віктара Малышчыца, Наталлю Лакотка, Сяргея Мілюхіна і студэнтаў-пераможцаў Рэспубліканскага фотаконкурсу “Маладзёжны погляд” Ганну Беражкову, Івана Веразуба, Ганну Дамініку Грыб, Марыю Зіганораву, Міхаіла Лук’янчыка, Валерыю Пратасевіч.

Трэвэл-фатограф, выкладчык Чырванаборскай школы фатаграфіі Сяргей Мілюхін і студэнт Брэсцкага дзяржаўнага ўніверсітэта імя А.С. Пушкіна, удзельнік выстаўкі Міхаіл Лук’янчык расказалі пра цікавы і адначасова складаны працэс здымак дзікай прыроды, разнастайнасць прыроды Чырванаборскай пушчы, дзе за некалькі кіламетраў чароўнага падарожжа можна ўбачыць і сасновы бор, і цяжкапраходныя балоты, і бярозавыя гаі, і чорнаальшанікі і разам з тым пазнаёміцца з шэрагам жывёл з Чырвонай кнігі Рэспублікі Беларусь.

Фотаработы прадстаўлены ўвазе гледачоў упершыню.

Выстаўка працуе да 25 мая 2023 года.
Дата яе заканчэння можа быць зменена.

Наведванне экспазіцыі ўваходзіць у кошт наведвання агляднай пляцоўкі.
Час работы выстаўкі адпавядае рэжыму работы агляднай пляцоўкі.

Тэлефон для даведак: (8 017) 368 37 37.