29 лістапада ў галерэі “Панарама” адбылося ўрачыстае адкрыццё выстаўкі фотамастака Аляксандра Ласмінскага “Пад небам Гродзеншчыны”.
На выстаўцы фатографа, журналіста, кіраўніка народнага фотаклуба “Гродна”, дырэктара тэлеканала “Гродна плюс” Аляксандра Ласмінскага прадстаўлена каля 50 пейзажаў незвычайнай прыгажосці, зробленых аўтарам з вышыні птушынага палёту.
Ідэя ўбачыць зямлю вачамі птушак з’явілася ў фотамастака ўжо даўно. Некалькі гадоў ён шукаў любую магчымасць падняцца ў неба над Гродзеншчынай, а сёння, маючы за плячыма больш за 20 палётаў, аўтар сапраўды можа ганарыцца сваім “паветраным” архівам, якога хопіць не на адну выстаўку. Абляцеўшы найбольш цікавыя куткі Гродзенскай вобласці і зафіксаваўшы фотакамерай непаўторныя пейзажы роднай зямлі, Ласмінскі адкрыў гледачу яе непаўторную прыгажосць і гармонію.
У мерапрыемстве ўзялі ўдзел дэпутаты Палаты прадстаўнікоў Нацыянальнага сходу Рэспублікі Беларусь Марыя Бірукова і Аляксандр Антоненка, намеснік начальніка ўпраўлення культуры Гродзенскага гарвыканкама Сяргей Маціевіч, фотамастак Юрый Іваноў, загадчык рэдакцыі выдавецтва “Беларусь” Сяргей Пешын, загадчык аддзела галерэйна-выставачнай дзейнасці Нацыянальнай бібліятэкі Беларусі Фёдар Ястраб, аўтар выстаўкі “Пад небам Гродзеншчыны” Аляксандр Ласмінскі.
У рамках мерапрыемства адбылася прэзентацыя фотаальбома Аляксандра Ласмінскага “Гродзенская зямля з вышыні птушынага палёту”.
Выстаўка будзе доўжыцца да 10 студзеня 2012 г.
З 30 лістапада ўваход на выстаўку платны, складае кошт наведвання агляднай пляцоўкі.