13 верасня ў бібліятэцы адбылося адкрыццё выставачнага праекта “Нацыянальная бібліятэка Беларусі: учора, сёння, заўтра”, прымеркаванага да яе 100-годдзя.
Сярод разнастайнасці місій, мэт і задач бібліятэкі быў, ёсць і будзе галоўны наратыў – несці “святло ведаў” пакаленням чытачоў. Ён вобразна перададзены ў экспазіцыі мігценнем і пяшчотным ззяннем старых фотаздымкаў, і насычаным сімвалізмам сучасных работ.
У экспазіцыі прадстаўлены мастацкія фатаграфіі, сабраныя спецыяльна да стогадовага юбілею. Індывідуальныя стыль і почырк фотамастакоў дазваляюць убачыць мінулае, сучаснасць і будучыню бібліятэкі праз прызму творчага ўяўлення аўтараў.
Архіўныя фатаграфіі вобразна ўзгадваюць мінулае стагоддзе дзейнасці бібліятэкі, нібыта гартаюць старонкі яе гісторыі. Фотаздымкі сённяшняй бібліятэкі ў адпаведнасці з архітэктурным рашэннем адлюстроўваюць шматграннасць яе амплуа, каштоўнасць і святло ведаў, бясконцасць пазнавальнага свету.
Генеральны дырэктар Нацыянальнай бібліятэкі Беларусі Аксана Кніжнікава выступіла з прывітальным словам, павіншавала калег з векавым юбілеем і пажадала моцнага здароўя, поспехаў ва ўсіх пачынаннях і энергіі для ажыццяўлення любых задум.
Намеснік дырэктара Нацыянальнага архіва Рэспублікі Беларусь Алена Стуканава павіншавала прысутных са святам і падзякавала за шматгадовае супрацоўніцтва і каласальны ўклад у развіццё беларускай культуры.
Прафесар, доктар архітэктуры, выкладчык кафедры архітэктуры жылых і грамадскіх будынкаў архітэктурнага факультэта Беларускага нацыянальнага тэхнічнага ўніверсітэта Сяргей Сергачоў выказаў падзяку супрацоўнікам бібліятэкі за добрасумленную працу і любоў да сваёй справы, а таксама распавёў аб гісторыі стварэння “дыямента” – будынка, які ўвайшоў у энцыклапедыі і сусветныя даведнікі па архітэктуры, архітэктурных і мастацкіх асаблівасцях.
Старшыня народнага фотаклуба “Мінск”, фотамастак Аляксандр Чанцоў павіншаваў прысутных з прафесійнымі святамі і падзяліўся сваім меркаваннем аб прадстаўленых фотамастакамі работах і гісторыяй іх стварэння.
Сябра Беларускага саюза мастакоў, Беларускага саюза дызайнераў, арт-крытык Ларыса Фінкельштэйн нагадала аб гісторыі бібліятэкі, цёплымі словамі ўзгадала сумесную шматгадовую дзейнасць, пажадала ніколі не спыняцца на дасягнутым і горда трымаць высокі ўзровень, уласцівы сучаснай Нацыянальнай бібліятэцы Беларусі.
Выставачны праект прымеркаваны да 100-годдзя ўстановы і распавядае аб ёй як найбуйнейшым інфармацыйным і сацыякультурным цэнтры краіны, унікальным сховішчы нацыянальных дакументаў, установе, якая імкліва відазмяняецца ў адпаведнасці з патрабаваннямі часу, а таксама аб супрацоўніках, якія адданы прафесіі і вылучаюцца сапраўднай любоўю да сваёй справы.
Большасць фотаздымкаў экспануецца ўпершыню.
Выставачны праект будзе працаваць да 1 кастрычніка 2022 года.
Дата яго заканчэння можа быць зменена.
Час работы выстаўкі адпавядае рэжыму работы бібліятэкі.
Уваход – па чытацкім білеце або білеце сацыякультурнага цэнтра.
Матэрыял пададзены аддзелам сувязей з грамадскасцю.