31 мая ў бібліятэцы адбылося адкрыццё выстаўкі “Паэтыка фотаграфікі”, прысвечанай 75-гадоваму юбілею з дня нараджэння ганаровага члена найстарэйшага беларускага фотаклуба “Мінск”, аднаго з самых яркіх прадстаўнікоў літоўскай школы фатаграфіі Віталя Бутырына.
На выстаўцы прадстаўлены самыя значныя серыі здымкаў Віталя Бутырына з архіва фотаклуба “Мінск” і асобныя аўтарскія работы з асабістых калекцый мінскіх фатографаў. Большасць здымкаў у экспазіцыі выкананы ў жанры фантастычнай навелы аб таямнічым і невядомым, таму наведвальнікаў чакае цэлы спектр эмоцый. Не пакінуць абыякавымі імгненні жыцця як метафары ў серыях “Рэквіем” і “Апасіяната”. Пашыраць уяўленне аб рэальнасці лёсы чалавека і планеты ў серыях-разважаннях “Казкі мора”, “Нараджэнне” і “Terra Incognita”. Кране іранічны аповед аб вайсковых буднях у серыі “Армейскі дзённік” і шчымліва рэалістычная серыя “НДІ анкалогіі”. Музыкай і пластыкай напоўнены архітэктурныя матывы, графіка светлапісам, мерны векавы рытм мора ў серыях “Цывілізацыі” і “Тытаны”. Уражваюць паэтычнасцю фігуры жанчын, нібы таямнічыя кветкі, у цыкле работ “Нерынга”.
Экспазіцыю дапаўняюць выданні з калекцыі члена фотаклуба “Мінск” Віктара Бутры, сярод якіх – кнігі аб мастацкай фатаграфіі і выданні, ілюстраваныя Віталем Бутырыным, а таксама каталогі яго фотаработ.
На адкрыцці выстаўкі выступілі намеснік генеральнага дырэктара Нацыянальнай бібліятэкі Беларусі Віктар Пшыбытка, старшыня народнага фотаклуба “Мінск”, фотамастак Аляксандр Чанцоў, мастак, член журы мінскіх конкурсаў “Фотаграфіка” Аляксандр Зіменка, фатограф, удзельнік шматлікіх выставак у Беларусі і за мяжой Сяргей Кажамякін, мастацтвазнаўца, арт-крытык, арт-дырэктар аўтарскай некамерцыйнай канцэптуальнай галерэі “Брама” (1992–2022), член Беларускага саюза мастакоў, Беларускага саюза дызайнераў Ларыса Фінкельштэйн.
Прыемным сюрпрызам стаў падарунак члена праўлення народнага фотаклуба “Радуга” Ірыны Савосінай, якая перадала бібліятэцы выданне “Народный фотоклуб «Радуга»” (2021) – фотаальбом на рускай і англійскай мовах, адным з укладальнікаў якога яна з’яўляецца.
Выстаўка “Паэтыка фотаграфікі” будзе працаваць у галерэі “Лабірынт” (3-ці паверх) да 9 лістапада 2022 г.
Дата яе заканчэння можа быць зменена.
Уваход – па чытацкім білеце або білеце сацыякультурнага цэнтра.
Час работы выстаўкі адпавядае рэжыму работы бібліятэкі.
Матэрыял пададзены аддзелам сувязей з грамадскасцю.
