13 жніўня ў мабільнай галерэі (3-ці паверх) адбылося ўрачыстае адкрыццё культурна-асветніцкай выстаўкі “Марцін Лютар: 530 гадоў з дня нараджэння”.
Мерапрыемства падрыхтавана Нацыянальнай бібліятэкай Беларусі сумесна з грамадскім аб’яднаннем нямецкай культуры “Масты”.
Выстаўка распавядае пра жыццё і дзейнасць хрысціянскага багаслова, вялікага рэфарматара Германіі, перакладчыка Бібліі на нямецкую мову Марціна Лютара і прысвечана яго 530-годдзю.
У гісторыю нямецкай грамадскай думкі Марцін Лютар увайшоў і як дзеяч культуры – рэфарматар адукацыі, мовы, музыкі. У экспазіцыі прадстаўлены ілюстрацыйныя і інфармацыйныя матэрыялы. На плакатах можна ўбачыць партрэты Марціна Лютара і яго жонкі, карціны і гравюры з выявай нямецкага рэфарматара, фотаздымкі з месцаў, дзе нарадзіўся і працаваў у розныя часы багаслоў. Зацікавяць наведвальнікаў і здымкі тытульных лістоў выданняў, напісаных Марцінам Лютарам, а таксама ўрыўкі з пісем і змест яго легендарных 95 тэзісаў супраць індульгенцый, якія тэолаг прыбіў на браме царквы ў Вітэнбергу.
На ўрачыстым адкрыцці з прывітальнымі словамі выступілі першы намеснік дырэктара Нацыянальнай бібліятэкі Беларусі Алена Далгаполава, намеснік кіраўніка місіі Пасольства Федэратыўнай Рэспублікі Германіі ў Рэспубліцы Беларусь Хольгер Рапіяр, намеснік упаўнаважанага па справах рэлігій і нацыянальнасцей Рэспублікі Беларусь Уладзімір Ламека, дырэктар Рэспубліканскага цэнтра нацыянальных культур Міхаіл Рыбакоў, старшыня грамадскага аб’яднання нямецкай культуры “Масты” Вольга Штокман, біскуп Саюза евангельскіх хрысціян-баптыстаў у Рэспубліцы Беларусь Аляксандр Фірысюк. Шаноўныя госці ў сваіх выступленнях адзначылі важкасць асобы Марціна Лютара ў гісторыі Еўропы, а таксама падкрэслілі ўклад пратэстанцкіх плыняў у развіццё культуры Беларусі.
Выстаўка “Марцін Лютар: 530 гадоў з дня нараджэння” будзе працаваць да 29 верасня 2013 года.
Тэлефоны для даведак: (8 017) 293 27 56, 293 28 33.