21 ліпеня ў галерэі “Панарама” (22-гі паверх) адкрылася выстаўка творчых работ удзельнікаў гарадскога праекта “Маладыя таленты сталіцы”.
Гарадскі праект “Маладыя таленты сталіцы” стартаваў у 2006 годзе па ініцыятыве мастацкай галерэі “Палац” Мінскага дзяржаўнага палаца дзяцей і моладзі. Ён накіраваны на падтрымку юных талентаў у галіне дэкаратыўна-прыкладнога і выяўленчага мастацтва, стварае ўмовы для рэалізацыі іх творчага патэнцыялу, вучыць разумець і ацэньваць свае дасягненні, адкрывае гарызонты прафесійнага росту. За 10 гадоў плённай работы ў рамках праекта больш за 100 маладых аўтараў прадставілі сваю творчасць шырокаму кругу гледачоў на персанальных выстаўках і незабыўных майстар-класах.
Выстаўка знаёміць наведвальнікаў з творчасцю навучэнцаў, аб’яднаных па інтарэсах ва ўстановах дадатковай адукацыі дзяцей і моладзі, установах агульнай сярэдняй адукацыі і мастацкіх школах г. Мінска. У экспазіцыі прадстаўлены работы пераможцаў і лаўрэатаў гарадскіх, рэспубліканскіх і міжнародных выставак. Кожны аўтар непаўторны і індывідуальны ў сваёй творчасці, кожны варты прызнання гледачоў як будучы майстар сваёй справы.
Убачыць яркія карціны юных мастакоў можна да 22 жніўня 2016 года.
Уваход на выстаўку платны, складае кошт наведвання агляднай пляцоўкі.
Тэлефоны для даведак: (8 017) 293 27 56, 293 28 33.
Е-mail: pr@nlb.by