Традыцыйна напярэдадні самага першага вясенняга свята, Міжнароднага жаночага дня, дзверы Нацыянальнай бібліятэкі расчыніліся для аматараў кветак і знатакоў мастацтва. У восьмы раз праект-віншаванне стаў адкрытай пляцоўкай для сустрэчы тых наведвальнікаў, чые сэрцы абуджаюцца ад зімовага сну і імкнуцца да ўз’яднання з прыгажосцю.

Праект радуе разнастайнасцю прадстаўленых цікавых работ у галіне жывапісу і графікі, галоўнымі героямі якіх выступаюць кветкі. Прыгажосць гэтага стварэння прыроды нікога не пакідае абыякавым. Фактычна няма творчай асобы, якая не звярталася б да вобраза кветкі ці то ў нацюрмортах, ці то ў пейзажах, а часта і ў паўабстрактных сімвалічных кампазіцыях.

Адкрыў выстаўку загадчык галерэйна-выставачнага аддзела Нацыянальнай бібліятэкі Беларусі Аляксандр Зіменка, які паведаміў прысутным аб праекце, яго значнасці для пераемнасці мастацкіх традыцый, адметных асаблівасцях новага фармату мастацкага праекта “Кветкавы рай”.

Лірычны і лёгкі настрой мерапрыемству надала ігрой на скрыпцы салістка Дзяржаўнага ансамбля танца Рэспублікі Беларусь Яўгенія Дзям’янава.

Акрамя асалоды ад прыгажосці кветак, кожны наведвальнік выстаўкі меў магчымасць прыняць удзел у майстар-класах па майстраванні кветак у тэхніцы арыгамі, паспрабаваць намаляваць сваю першую карціну, а таксама стаць пераможцам конкурсаў і віктарын, атрымаўшы за гэта цудоўны падарунак або салодкі пачастунак.

З экспазіцыяй можна пазнаёміцца ў галерэі “Ракурс” на 2-м паверсе бібліятэкі.

Тэлефоны для даведак: (8 017) 293 27 56, 293 78 33.
Е-mail: pr@nlb.by