19 сакавіка ў Нацыянальнай бібліятэцы Беларусі адбылося ўрачыстае адкрыццё культурна-асветніцкага праекта "Будзь гаспадаром!", арганізаванага ў рамках Года беражлівасці.
Праект “Будзь гаспадаром!” уключае кніжную выстаўку і выстаўку беларускага агітацыйнага плаката 70–80 гадоў ХХ ст. У экспазіцыі прадстаўлена 46 аўтарскіх плакатаў з фондаў Нацыянальнай бібліятэкі Беларусі. Сярод аўтараў такія вядомыя майстры плаката, як А.М. Чуркін, М.В. Гурло, С.А. Волкаў, У.І. Жук, С.І. Ярохін, Т.В. Гардашнікава і іншыя.
На адкрыцці мерапрыемства выступілі загадчык аддзела галерэйна-выставачнай дзейнасці Нацыянальнай бібліятэкі Беларусі Фёдар Ястраб, загадчык сектара арганізацый кніжных выставак Ірына Васільковіч, заснавальнік першай беларускай галерэі “Брама”, арт-крытык Ларыса Фінкельштэйн.
Адна з мэтаў праекта – паказаць плакат не толькі як агітацыйны і ідэалагічны. Плакат з’яўляецца гісторыка-мастацкім дакументам “свайго часу” – часу нараджэння і непасрэднай службы на вулічных стэндах і ў грамадскіх інтэр’ерах. Ён захоўвае сваю актуальнасць як удзельнік падзей. Таму кожная выстаўка плакатнага мастацтва атрымлівае грамадскі рэзананс, уваскрашаючы мінулае, служыць паказчыкам адносін да яго ў сённяшнія дні.
Тэлефоны для даведак: (8 017) 293 27 67; 293 28 33.
Е-mail: pr@nlb.by