Пяшчотная і яркая, буйная і мініяцюрная – у выставачным праекце “Сузор’е вобразаў” прадстаўлена вышыўка таленавітых майстрых клуба “Сузор’е” пры Беларускім саюзе жанчын.
Ва ўмелых руках іголка і сотні рознакаляровых нітак стварылі маляўнічыя пейзажы, майстэрскія партрэты і нават творы па карцінах вядомых мастакоў.
Сімвалічна выстаўка разгарнулася ў самай верхняй выставачнай зале бібліятэкі – галерэі “Панарама” на вышыні каля 70 метраў! Менавіта там на радасць публіцы загарэліся сузор’і вобразаў.
У адкрыцці выстаўкі прынялі ўдзел першы намеснік Нацыянальнай бібліятэкі Беларусі, член Беларускага саюза жанчын Алена Далгаполава, старшыня Беларускага саюза жанчын Першамайскага раёна Таісія Пужэвіч, кіраўнік клуба “Сузор’е” Наталля Сак, паэтка, член Саюза пісьменнікаў Беларусі, член Беларускага саюза жанчын Валянціна Паліканіна.
Арганізатарамі праекта выступілі Нацыянальная бібліятэка Беларусі і Беларускі саюз жанчын.
Клуб вышывальшчыц “Сузор’е” існуе на працягу 12 гадоў, і з гадамі прафесіяналізм майстрых толькі расце разам з жаданнем упрыгожваць свет сваімі маляўнічымі працамі, дзе ў кожны шывок ўкладзена часціца душы.
Матэрыял прадастаўлены аддзелам сувязей з грамадскасцю.