23 сакавіка ў галерэі “Панарама” (22-гі паверх) адкрылася выстаўка “Пленэр-2016”, дзе прадстаўлена звыш 50 лепшых работ навучэнцаў Мінскага дзяржаўнага мастацкага каледжа імя А.К. Глебава.
Выкананыя ў розных тэхніках і манерах карціны перадаюць эмоцыі і ўражанні, атрыманыя юнакамі і дзяўчатамі падчас творчых вандраванняў па гарадах Беларусі і замежжы – Нясвіжы, Брэсце, Полацку, Санкт-Пецярбургу, Татрах і інш.
У чэрвені 2016 года маладыя мастакі прынялі ўдзел у Трэцім міжнародным студэнцкім пленэры “На радзіме І.М. Крамскога”, які праходзіў у горадзе Варонежы. А ў жніўні адбыўся міжнародны культурна-сацыяльны праект “Летняя творчая школа для адораных дзяцей і моладзі” ў Астрахані. Навучэнцы МДМК імя А.К. Глебава сталі першымі прадстаўнікамі Беларусі, якія прынялі ўдзел у гэтым праекце.
Першы намеснік дырэктара Нацыянальнай бібліятэкі Беларусі Алена Далгаполава нагадала ўсім прысутным, што роўна дзесяць гадоў таму ў новым будынку бібліятэкі адкрывалася экспазіцыя да 60-гадовага юбілею каледжа. Затым былі і іншыя выстаўкі работ навучэнцаў, кожная з якіх стала сапраўдным падарункам для нашых наведвальнікаў і гасцей.
Павіншаваць студэнтаў з гэтай значнай падзеяй у іх творчым жыцці прыйшоў старшыня Беларускага саюза мастакоў Рыгор Сітніца. “З цягам часу, калі вы пасталееце і станеце мастакамі-прафесіяналамі, успаміны пра пленэры будуць натхняць і зараджаць вас новымі творчымі сіламі”, – падзяліўся дасведчаны мастак з моладдзю.
“Выстаўка пленэрная – найбольш эмацыянальная, выйгрышная і праўдзівая”, – адзначыў дырэктар Мінскага дзяржаўнага мастацкага каледжа імя А.К. Глебава Аляксандр Шантаровіч. Ён уручыў граматы выкладчыкам, якія ўдзельнічалі ў пленэрах мінулага года, і расказаў пра планы на год бягучы. А іх наперадзе шмат!
“Сёлета каледжу спаўняецца 70 гадоў, а гэта значыць, нас чакае шмат юбілейных мастацкіх праектаў, часткай якіх з’яўляецца і сённяшняе мерапрыемства”, – адзначыў дырэктар мастацкай галерэі “Універсітэт культуры” Павел Сапацько.
Выязныя пленэры складаюць агульную арт-прастору, якая аб’ядноўвае мастакоў усяго свету. У чарговы раз пераконваемся – мастацтва аб’ядноўвае!
Работы маладых мастакоў будуць радаваць наведвальнікаў “Панарамы” да 23 красавіка 2017 года.
З 24 сакавіка 2017 года ўваход на выстаўку платны, складае кошт наведвання агляднай пляцоўкі.
Дата заканчэння выстаўкі можа быць зменена.
Удакладняйце інфармацыю па тэлефонах: (8 017) 293 28 23, 266 37 37.
Е-mail: pr@nlb.by
|
|
 |
|
 |
 |
 |
|
|
|
|
 |
 |
 |
