23 лістапада ў рамках Дзён расійскай культуры ў Рэспубліцы Беларусь адбылося ўрачыстае адкрыццё выставы графікі Сяргея Алімава “«Мёртвые души»: ілюстрацыі да паэмы М.В. Гогаля”.
Сяргей Аляксандравіч Алімаў (1938–2019) – народны мастак Расійскай Федэрацыі, правадзейны член Расійскай акадэміі мастацтваў, прафесар УДІКа, член Расійскай акадэміі кінематаграфічных мастацтваў. Гогалеўская тэма – адна з асноўных у творчасці Сяргея Алімава. Першыя малюнкі па Гогалю зроблены ім да аповесцей “Нос” і “Портрет” у 60–70-х гадах мінулага стагоддзя. Першае выданне “Мёртвых душ” з 15-цю яго ілюстрацыямі выйшла ў 1971 годзе, з таго моманту было створана яшчэ 25 малюнкаў у новай для мастака тэхніцы – шаўкаграфіі. Сяргею Аляксандравічу ўдалося пранікнуць у самую сутнасць “Мёртвых душ”, паказаць глыбіню характараў дзякуючы абранай тэхніцы, якая дазволіла дасягнуць практычна скульптурнай рэльефнасці вобразаў.
На выставачным праекце можна ўбачыць серыю з 40 графічных работ. Яны ўжо былі прадстаўлены ў Маскве, Вене, Бруселі, Рыме, а таксама многіх гарадах Расіі: Пяцігорску, Разані, Тальяці, Іжэўску, Сарапулі.
З прывітальным словам на мерапрыемстве выступіў намеснік генеральнага дырэктара Нацыянальнай бібліятэкі Беларусі Віктар Пшыбытка. Сваім экспертным меркаваннем аб прадстаўленых працах і гісторыі іх стварэння падзяліліся кіраўнік Рускага дома ў Мінску Юрый Макушын, прадстаўнік Расійскага фонду культуры Вольга Буцкая, удава Сяргея Аляксандравіча Алімава мастацтвазнаўца, член Маскоўскага саюза мастакоў і Асацыяцыі мастацтвазнаўцаў Наталля Аўгусціновіч.
Выставу графікі дапоўніла кніжная экспазіцыя з фондаў Нацыянальнай бібліятэкі Беларусі, дзе прадстаўлены першыя выданні паэмы “Похождения Чичикова, или Мёртвые души” (1842, 1846), першыя ілюстраваныя выданні твора. Адзін з самых яркіх асобнікаў – фаліянт 1901 года Пецярбургскага выдавецтва А.Ф. Маркса з 10 геліягравюрамі, 355 ілюстрацыямі, ініцыяламі і віньеткамі.
У рамках мерапрыемства адбылася перадача выданняў Нацыянальнай бібліятэцы Беларусі ад Расійскага фонду культуры. Сярод іх – літаратурна-мастацкія кнігі серыі “Лауреаты Международного конкурса имени Сергея Михалкова”, навукова-папулярныя выданні, альбомы па мастацтве.
Азнаёміцца з выставай можна да 30 студзеня 2023 года.
Дата яе заканчэння можа быць зменена.
Час работы выстаўкі адпавядае рэжыму работы бібліятэкі.
Уваход – па чытацкім білеце або білеце сацыякультурнага цэнтра.
Тэлефон для даведак: (8 017) 368 37 37.
Матэрыял пададзены аддзелам сувязей з грамадскасцю.