17 лютага ў галерэі “Панарама” адбылося ўрачыстае адкрыццё выстаўкі фотаработ Віктара Суглоба “Пейзажы Беларусі”.
Віктар Суглоб прафесійна звязаны з фатаграфіяй больш за 40 гадоў. Доўгі час ён з’яўляецца сябрам фотаклуба “Мінск”, а таксама аб'яднання (творчага саюза) “Фотамастацтва”. Выстаўка “Пейзажы Беларусі” – гэта новая якасная прыступка ў творчасці мастака. Экспазіцыя прадстаўляе ўвазе аматараў мастацтва найлепшыя творы майстра.
У сваёй творчасці мастак аддае перавагу пейзажам і гарадскім краявідам, а таксама студыйным нацюрмортам. Пейзаж у працах Віктара Суглоба не проста існуе сам па сабе, ён ачалавечаны. Для фотаработ аўтара характэрныя скрупулёзны рэалізм малюнка, дбайная праца над дэталямі, строгасць і складнасць кампазіцыі.
Як адзначыла пад час адкрыцця экспазіцыі першы намеснік дырэктара Алена Далгаполава, бібліятэка ўжо не першы раз арганізоўвае выстаўку з “Фотамастацтвам”. Установа ладзіла праекты “Кветкавы рай”, “Арт-крок”, у якіх браў удзел і Віктар Суглоб.
“На 22-м паверсе бібліятэкі мы некалі рабілі першую выстаўку. У той час яшчэ не ўсе памяшканні былі падрыхтаваны для наведвальнікаў. Сёння Віктар Суглоб выстаўляецца тут адзін... За гэтай экспазіцыяй стаяць сотні кіламетраў дарог, незлічоная колькасць месцаў, праз чысціню і прыгажосць якіх фотамастак адкрывае нам сваю душу”, – расказаў гасцям імпрэзы фотамастак Юрый Васільеў.
Аўтара выстаўкі павіншавалі і яго названыя настаўнікі, і сябры, і калегі. Віктар Суглоб, у сваю чаргу, падзякаваў усім за цёплыя словы і пажадаў прыемнага прагляду экспазіцыі.