25 верасня ў галерэі “Ракурс” (2-гі паверх) адкрылася фотавыстаўка Віталія Раковіча “Каляровая Беларусь”.
Аўтар працуе ў стылі неафатаграфікі, дзе выява, створаная пры дапамозе фотаапарата, з’яўляецца толькі асновай для далейшай работы і стварэння закончанага мастацкага твора. Сённяшняя экспазіцыя прадстаўляе ўвазе гледачоў каля 40 фотаздымкаў майстра, якія здзіўляюць і захапляюць чысцінёй і яскравасцю фарбаў.
Як расказала пад час урачыстага адкрыцця выстаўкі першы намеснік дырэктара Нацыянальнай бібліятэкі Беларусі Алена Далгаполава, бібліятэка знаёміць сваіх наведвальнікаў з творчасцю Віталія Раковіча ўжо другі раз. Так, у 2012 годзе была арганізавана выстаўка “Святло беларускіх храмаў”, якая мела вялікі поспех сярод гледачоў.
Беларусь была і застаецца для фотамастака самым цікавым і любімым месцам для падарожжаў і творчасці. У шматлікіх вандроўках па самых розных кутках былога СССР ён не раз пераконваўся, што кожная мясціна па-свойму прыгожая, але нейкую цеплыню заўсёды адчувае аўтар ад вяртання ў Беларусь, бо яна – непаўторная, і любоў да яе – неад’емная частка нашага “я”, што існуе ў кожным з нас з крывёй продкаў. Таму фотавыстаўка Віталія Раковіча – гэта не толькі гульні з колерам, а яшчэ і прызнанне ў любові да сваёй Радзімы.
“Талент Раковіча заключаецца ў тым, што ён знаходзіць такія мастацкія прыёмы, якія, здаецца, вымаюць душу, ператвараючы фотаздымкі ў глыбокія, але простыя для ўспрымання мастацкія творы”, – сказаў пра майстэрства творцы яго настаўнік і сябра, дацэнт кафедры журналістыкі Інстытута парламентарызму і прадпрымальніцтва, фотамастак Аркадзій Бірылка.
Віталій Раковіч займаецца фатаграфіяй з 1978 года: фотаапарат з дзяцінства імкнуся заўсёды трымаць пры сабе. Але як відам выяўленчага мастацтва Віталій актыўна пачаў займацца фатаграфіяй з 2003 года, а ўжо праз год у Маскве адбылася першая выстаўка аўтара. З 2005 года ён з’яўляецца членам народнага фотаклуба “Мiнск” (з 2013 па 2014 год – быў яго старшынёй). З 2008 года Віталій Раковіч – член Саюза фотамастакоў Беларусі, беларускага грамадскага аб’яднання “Фотамастацтва”, з 2012 года – член праўлення Саюза фотамастакоў Беларусі.
У актыве Віталія Раковіча больш за трыццаць персанальных выставак, ён з’яўляецца арганізатарам, куратарам і ўдзельнікам дзясяткаў сумесных выставачных фотапраектаў. Віталій Раковіч – пераможца многіх фатаграфічных міжнародных і рэспубліканскіх конкурсаў. Работы фотамастака захоўваюцца ў калекцыях Нацыянальнай бібліятэкі Беларусі, Літаратурным музеі Максіма Багдановіча, Доме Беларусі ў Варшаве і Маскве, Музеі сучаснага выяўленчага мастацтва ў Мінску, а таксама ў прыватных калекцыях Расіі, Беларусі, Украіны, Абхазіі, Літвы, Польшчы, Германіі, ЗША і Ізраіля.
Выстаўка “Каляровая Беларусь” будзе працаваць да 11 лістапада 2014 года.