14 лістапада ў бібліятэцы адкрылася выстаўка коміксаў Кшыштафа Астроўскага “Пасажыр з «Настрома»”.
Літаратурна-мастацкая экспазіцыя, прымеркаваная да 160-годдзя з дня нараджэння пісьменніка Джозэфа Конрада, арганізавана ў межах Месяца польскай літаратуры.
Аскараносны фантастычны фільм “Чужы” Рыдлі Скота, галівудскі хіт “Конг: востраў чэрапа”, дыск Desire Боба Дылана… У гэтым жа шэрагу імён – Таранціна і Хічкок, Iron Maiden, Анджэй Вайда і іншыя. Усіх гэтых таленавітых людзей яднае асаблівае стаўленне да творчасці Джозэфа Конрада, англійскага класіка з польскімі каранямі. Пісьменнік стаў для іх ідэйным натхняльнікам, дзякуючы чаму яго творчасць атрымала новую інтэрпрэтацыю ў сучаснай культуры.
Польскі мастак-графік Кшыштаф Астроўскі захапіўся ідэяй стварэння выстаўкі пасля інтэрв’ю Тома Хардзі з нагоды адной з самых гучных тэлепрэм’ер апошніх гадоў – серыяла “Табу”. Акцёр сказаў тады, што на стварэнне сцэнарыя яго натхніла постаць капітана Марлоу з кніг Джозэфа Конрада.
Выстаўка “Пасажыр з «Настрома»” – гэта “Конрад для пачаткоўцаў”. Яна адкрывае самыя важныя старонкі жыцця пісьменніка і заахвочвае да больш глыбокага і ўдумлівага знаёмства з яго натхняльнай творчасцю.
У вернісажы ўзялі ўдзел першы намеснік дырэктара Нацыянальнай бібліятэкі Беларусі Алена Далгаполава, саветнік Пасольства Рэспублікі Польшча ў Рэспубліцы Беларусь, дырэктар Польскага інстытута ў Мінску Матэўш Адамскі, намеснік кіраўніка дыпламатычнай місіі Вялікабрытаніі і Паўночнай Ірландыі ў Рэспубліцы Беларусь Ян Фокс, каардынатар праектаў Цэнтра дакументацыі і даследавання творчасці Джозэфа Конрада, суарганізатар агульнапольскай навуковай канферэнцыі “Конрад і (поп)тэксты” Пётр Жоландзь.
Выстаўку “Пасажыр з «Настрома»” можна ўбачыць ў галерэі “Атрыум” (3-ці паверх) да 15 студзеня 2018 года.
Дата заканчэння работы выстаўкі можа быць зменена.
Тэлефоны для даведак: (8 017) 293 28 81, 293 28 23.
Е-mail: pr@nlb.by
 |
 |
 |
 |
 |
 |
 |
 |
 |
