3 чэрвеня ў галерэі “Панарама” (22-гі паверх) адбылося ўрачыстае адкрыццё выстаўкі дыпломных работ навучэнцаў Комплексу дзяржаўных школ мастацтваў імя Т. Макоўскага (Польшча) і Мінскага дзяржаўнага мастацкага каледжа імя А. Глебава (Беларусь)
Экспазіцыя пад назвай “Дыялогі” прапануе да ўвагі гледачоў звыш 50 творчых работ навучэнцаў і выпускнікоў устаноў адукацыі ў такіх відах выяўленчага мастацтва, як жывапіс, дызайн і скульптура.
Як адзначыла, адкрываючы выстаўку, першы намеснік дырэктара Нацыянальнай бібліятэкі Беларусі Алена Далгаполава, галерэя “Панарама” ў бібліятэцы – гэта пляцоўка, якую часта наведваюць як мінчане, так і госці сталіцы, што дае магчымасць пазнаёміць з работамі маладых дараванняў вялікую колькасць людзей.
У сваю чаргу дырэктар Мінскага дзяржаўнага мастацкага каледжа імя А. Глебава Аляксандр Шантаровіч акцэнтаваў увагу на значэнні выстаўкі для беларускага, польскага і расійскага бакоў: “Дыялог вельмі важны для міжкультурных і міжнацыянальных узаемаадносін. З польскімі калегамі мы супрацоўнічаем ужо год, і вось адкрываем выстаўку, у чым ёсць заслуга многіх людзей. Сёння да нас далучыўся і Расійскі каледж традыцыйнай культуры. Спадзяюся, што знаходжанне тут будзе для нашых польскіх і расійскіх гасцей пазнавальным і прыемным”.
Узаемадзеянне дзвюх навучальных устаноў, багатых гісторыяй, устойлівымі традыцыямі, школай выкладання спрыяе культуралагічнаму ўзаемаўзбагачэнню, пошуку інавацый у методыках выхавання ў галіне мастацкай адукацыі і ў фарміраванні творчай асобы, умацаванню і развіццю добрасуседскіх сувязей паміж краінамі-ўдзельніцамі пад час творчых зносін.
Уваход на выстаўку платны (складае кошт наведвання агляднай пляцоўкі).
Выстаўка будзе дэманстравацца да 15 чэрвеня 2014 г.
Тэлефоны для даведак: (8 017) 293 27 56, 293 78 33.
Е-mail: pr@nlb.by