21 верасня ў галерэі “Атрыум” Нацыянальнай бібліятэкі Беларусі ў межах фестывалю мастацтва “Арт-Мінск 2021” пачала работу аднайменная мастацкая выстаўка.
Бібліятэка ў чацвёрты раз далучылася да фестывалю мастацтва. Як і ў мінулыя гады, “Арт-Мінск” аб’яднаў некалькі выставачных пляцовак у розных частках горада, на некаторы час ператвараючы іх у адну вялікую і яскравую прастору.
Насычаная экспазіцыя ў Нацыянальнай бібліятэцы прадставіла лепшыя і найбольш арыгінальныя творы са скарбонкі сучаснага беларускага выяўленчага мастацтва. Госці выстаўкі пазнаёміліся з работамі мастакоў розных пакаленняў і светапоглядаў, аб’яднаных выяўленчай энергіяй і выканальніцкім талентам.
У мерапрыемстве прынялі ўдзел генеральны дырэктар Нацыянальнай бібліятэкі Беларусі Аксана Кніжнікава, намеснік старшыні па творчай рабоце грамадскага аб’яднання "Беларускі саюз мастакоў", мастак-графік Андрэй Басалыга, першы намеснік старшыні грамадскага аб’яднання “Беларускі саюз мастакоў” Наталля Шаранговіч і дырэктар Цэнтра выяўленчага і медыямастацтва “Новая культурная ініцыятыва” Аляксандр Зіменка.
Арганізатарамі і партнёрамі выстаўкі выступілі Нацыянальная бібліятэка Беларусі, Беларускі саюз мастакоў, Рэспубліканская мастацкая галерэя (Палац мастацтва).
Запрашаем атрымаць асалоду ад мастацтва ў галерэю “Атрыум” (3-ці паверх).
Выстаўка будзе працаваць да 24 кастрычніка 2021 г.
Дата заканчэння працы экспазіцыі можа быць зменена.
На вернісаж уваход вольны. У астатні час – па чытацкім білеце або білеце сацыякультурнага цэнтра.
Тэлефон для даведак: (8 017) 368 37 37.
Матэрыял пададзены аддзелам сувязей з грамадскасцю.