29 студзеня 2009 года ў Нацыянальнай бібліятэцы Беларусі адбылося ўрачыстае адкрыццё выстаўкі “Арт-крок”.
На вернісажы былі прадстаўлены 83 творы беларускіх аўтараў, выкананыя ў яскравай палітры сучаснага мастацтва: графіка, жывапіс і фота. Сярод аўтараў ёсць і тыя, хто яшчэ толькі-толькі пачынае свой творчы шлях, і такія добра вядомыя беларускаму гледачу мастакі, як В. Касцючэнка, У. Ганчарук, С. Давідовіч, З. Сурыновіч, А. Забаўчык, У. Кожух, З. Луцэвіч, Ф. Ястраб, А. Некрашэвіч і іншыя.
Падчас адкрыцця выстаўкі сваё майстэрства гледачам прадэманстравалі ўдзельніцы музычнага тэатра “Надзея” і салістка ансамбля “Перформанс” В. Дворнікава.
У святочнай цырымоніі адкрыцця выстаўкі уступным словам гасцей вітаў загадчык галерэйна-выставачнага аддзела Нацыянальнай бібліятэкі Беларусі Ф.А. Ястраб, свае віншаванні і пажаданні прысутным выказалі кандыдат мастацтвазнаўства, дацэнт Беларускай дзяржаўнай акадэміі мастацтваў Я.Ф. Шунейка і мастак В. Касцючэнка.
Наведаць выстаўку можна да 22 лютага.
Уваход цэнтральны, свабодны.
