23 чэрвеня ў галерэі “Панарама” Нацыянальнай бібліятэкі Беларусі адбылося ўрачыстае адкрыццё фотавыстаўкі “Амерыка вачыма беларусаў”.
Гэта сумесны праект Пасольства Злучаных Штатаў Амерыкі ў Рэспубліцы Беларусь і Нацыянальнай бібліятэкі Беларусі.
Больш за 70 работ прадставілі пераможцы і ўдзельнікі конкурсу “My America”, які праводзіўся ў пачатку года Пасольствам ЗША ў Рэспубліцы Беларусь.
Зробленыя беларускімі фотааматарамі і прафесійнымі фатографамі здымкі адлюстроўваюць культуру і традыцыі ЗША, прыгажосць прыроды, архітэктуру і памятныя мясціны гэтай краіны, а таксама прапаноўваюць юмарыстычныя сітуацыі, сведкамі якіх сталі аўтары фатаграфій.
Адкрылі выстаўку намеснік дырэктара па навуковай рабоце і сувязях з грамадскасцю Нацыянальнай бібліятэкі Беларусі Людміла Кірухіна і часовы павераны ў справах ЗША ў Рэспубліцы Беларусь Майкл Скэнлан. У мерапрыемстве ўзяў удзел старшыня журы конкурсу “My America”, фотамастак Уладзімір Парфянок. Цырымонію ўзнагароджання пераможцаў конкурсу правяла асістэнт аташэ па пытаннях інфармацыі, адукацыі і культуры Орлі Кайнэр.
Майкл Скэнлан уручыў Нацыянальнай бібліятэцы гадавую падпіску на пяць амерыканскіх часопісаў па сучасным мастацтве і архітэктуры ЗША, а таксама рад альбомаў, якія адлюстроўваюць разнастайнасць прыроды і гарадоў Амерыкі, жыццё амерыканцаў. У сваю чаргу Людміла Кірухіна паднесла памятны падарунак спадару Скэнлану.
Выстаўка будзе доўжыцца да 5 ліпеня ў галерэі “Панарама” (22-гі паверх, закрытая аглядная пляцоўка). Плата за ўваход складае кошт наведвання агляднай пляцоўкі.