15 верасня ў Дзелавым і культурным комплексе Пасольства Рэспублікі Беларусь у Расійскай Федэрацыі адкрыўся фотапраект Нацыянальнай бібліятэкі “Беларусь: чароўныя імгненні”. Мерапрыемства было прымеркавана да Дня народнага адзінства.
Экспазіцыя ўяўляе сабой серыю фотаздымкаў, якія апавядаюць аб маляўнічай беларускай прыродзе і сімвалах беларускай культуры. У кожнай фотазамалёўкі – свой настрой і характар, свая гісторыя. Аўтары 20 фотаімгненняў – вядомыя беларускія фатографы. Беларусь скрозь прызму іх фотааб’ектываў здзівіла, узрушыла, заінтрыгавала.
Беларусь паўстала квітнеючай, разнастайнай і непаўторнай, з яркай багатай гісторыяй, краінай помнікаў старажытнай культуры і архітэктуры. Чароўныя віды з вышыні птушынага палёту, містычная прыгажосць беларускіх абшараў, мінімалістычныя пейзажы, сотні кіламетраў запаведнікаў і тысячы азёр, вялікія дзіцячыя вочы і шчырыя ўсмешкі – маляўнічы віхор фотавобразаў распавёў гледачам пра Беларусь.
Мерапрыемства не пакінула гледачоў абыякавымі. Уражлівыя фотаімгненні запамінаюцца, запрашаючы наведаць краіну і ўбачыць цудоўнае на свае вочы.
Падрабязней тут.
Матэрыял пададзены аддзелам галерэйна-выставачнай дзейнасці.
