16 лютага ў атрыуме Нацыянальнай бібліятэкі Беларусі адкрылася рэспубліканская выстаўка кніжнай графікі «ILLUSTRATIO. Разнастайнасць тэхнік ілюстравання».
Мэта праекта – звярнуць увагу грамадскасці на каштоўнасць ілюстрацый у друкаваных выданнях, розныя графічныя тэхнікі іх стварэння, дзякуючы якім кнігі становяцца ўнікальнымі і непаўторнымі, наглядна прадэманстраваць высокі мастацкі ўзровень тэхнік ілюстравання і лепшыя ўзоры нацыянальнага кнігавыдання.
Распачаў мерапрыемства і надаў яму непаўторную творчую атмасферу тэатр танца “ОтражениЯ” Беларускага дзяржаўнага ўніверсітэта інфарматыкі і радыёэлектронікі пад кіраўніцтвам Антаніны Руткоўскай.
З прывітальным словам выступіў генеральны дырэктар Нацыянальнай бібліятэкі Беларусі Раман Матульскі:
“Сёння ў нас адкрыццё незвычайнай выстаўкі, прысвечанай афармленню кнігі. Гэтая традыцыя доўжыцца больш за 500 гадоў: першыя гравюры былі змешчаны яшчэ ў кнігах першадрукара Францыска Скарыны, факсімільныя выданні якіх можна ўбачыць у экспазіцыі. Беларуская кніга – прыгожая, і ў гэтым важную ролю адыгрывае ілюстратар. Той, хто робіць яе знешні выгляд прыцягальным і раскрывае той сэнс, які не заўсёды бачны за словамі”.
Дэкан мастацкага факультэта Беларускай дзяржаўнай акадэміі мастацтваў Ганна Конанава адзначыла:
“Гісторык мастацтва, жывапісец, графік Уладзімір Фаворскі параўнаў кнігу з архітэктурным помнікам і пазначыў яе як прасторавы малюнак літаратурнага твора, які развіваецца ў часе. Працягваючы гэтую думку, хачу падкрэсліць, што мастак, афармляючы кнігу, арганізоўвае нейкае падарожжа па ёй, нібы па інтэр'ерах цудоўнага архітэктурнага збудавання. Нідзе няма такога часавага і каляровага акорда, як у кнізе і архітэктуры. Невыпадкова ў экспазіцыі разам з вядомымі майстрамі прадстаўлены работы і студэнтаў двух факультэтаў Беларускай дзяржаўнай акадэміі мастацтваў - факультэта дызайну прыкладнога мастацтва і мастацкага факультэта”.
Адзін з удзельнікаў выстаўкі “ILLUSTRATIO” загадчык кафедры графікі Беларускай дзяржаўнай акадэміі мастацтваў Юрый Хілько заўважыў: “Выстаўка дае суцэльнае і прафесійнае ўяўленне пра графічныя тэхнікі і ілюстрацыі. Варта зрабіць падобныя экспазіцыі добрай традыцыяй”.
Намеснік старшыні грамадскага аб’яднання “Беларускі саюз мастакоў” па творчай рабоце, мастак-графік Андрэй Басалыга прыняў удзел у стварэнні відэамайстар-класса па афорце, аднаго з тых, якія дэманструюцца ў экспазіцыі. Мастак падкрэсліў, што выстаўка атрымалася навукова-даследчай і нават назваў яе ўнікальнай. Кнігі, арыгіналы ілюстрацый, матэрыялы і інструменты для працы ў графічных тэхніках дазваляюць пранікнуцца цудам стварэння кнігі, паглядзець на яе як на твор мастацтва.
У экспазіцыі гледачы могуць убачыць факсімільныя выданні беларускага першадрукара Францыска Скарыны, “Манга” Кацусіка Хакусая, рэдкія выданні французскай паэзіі, хромалітаграфіі еўрапейскай моды канца XIX ст. і інш.
Выданні знаёмяць не толькі з разнастайнасцю існуючых тэхнік, але і з тэматычным і жанравым ахопамі кніг.
Сапраўды, галоўнай каштоўнасцю выстаўкі з'яўляецца разнастайнасць. На ёй прадстаўлена і графіка беларускіх мастакоў: афорты, літаграфіі, лінарыт, дрэварыт, акварэлі і аркушы ў іншых тэхніках. Работы класікаў ілюструюць творы беларускіх і сусветных паэтаў і пісьменнікаў, выданні аб гісторыі Беларусі, зборнікі казак для дзяцей і г.д.
Уявіць асаблівасці працы мастака падчас працэсу стварэння ілюстрацыі дапамогуць афортны станок, фарбы, шаберы, пэндзлі, штыхелі, разцы, літаграфскі камень і іншыя прадстаўленыя на выстаўцы матэрыялы. Таксама ў экспазіцыю ўвайшлі навуковыя, навукова-папулярныя, вучэбныя выданні, прысвечаныя тэхнікам ілюстравання.
Праект накіраваны на папулярызацыю кніжнага мастацтва і ўключае сустрэчы з мастакамі-ілюстратарамі, а таксама інтэрактыўныя пляцоўкі ад беларускіх мастакоў-графікаў Веры Каўзановіч, Марыі Дарожкі, Андрэя Басалыгі. Натхніўшыся ўзорамі сусветнай ілюстрацыі, можна паспрабаваць стварыць сваю з дапамогай сучасных тэхналогій.
Праект будзе доўжыцца да 9 жніўня 2021 г.
Дата заканчэння працы экспазіцыі можа быць зменена.
Уваход – па чытацкім білеце або білеце сацыякультурнага цэнтра.
Тэлефон для даведак: (8 017) 368 97 37.
Чытайце таксама: ФОТОФАКТ: Выставка книжной графики открылась в Национальной библиотеке (БелТА)