21 сакавіка ў галерэі “Лабірынт” (3-ці паверх) адкрылася выстаўка “На мяжы рэальнасці”, прымеркаваная да 65-гадовага юбілею мастака Рыгора Мяжуева. Экспазіцыя падрыхтавана ў рамках Года міру і стварэння.
Аўтар – выпускнік мастацка-графічнага факультэта Віцебскага педінстытута (цяпер – Віцебскі дзяржаўны ўніверсітэт імя П.М. Машэрава). Працуе ў жывапісе і акварэлі ў жанрах пейзажа, нацюрморта і партрэта, выкладае малюнак і кампазіцыю ў гімназіі-каледжы мастацтваў у Маладзечна. З 1996 г. прымае ўдзел у шматлікіх беларускіх мастацкіх выстаўках акварэлі і зборных выставачных праектах.
Прадстаўленыя ў экспазіцыі работы знаёмяць гледача з абстрактнымі кампазіцыямі, беларускімі краявідамі і класічнымі нацюрмортамі. Рыгора Васільевіча натхняюць беларускі вясковы побыт і традыцыі, былыя фальваркі і старыя замкі, адметныя краявіды і прыродныя з’явы. Эксперымент і класіка – два розныя амплуа, у якіх аўтар працуе на працягу жыцця.
Кранальныя, цёплыя беларускія краявіды, камерныя, рамантычныя нацюрморты выкананы з бездакорным майстэрствам і глыбокай павагай да беларускай гісторыі і традыцый. Мастак разважае аб нябёсах і зямлі, часе і пытаннях быцця, яго захапляе прыгажосць родных мясцін, успаміны пра свае карані. Мінулае паўстае як бы застылым у часе, з адценнем настальгіі, асэнсаванасці сённяшняга дня. Вясковы хатні побыт, з пяшчотай прапісаныя дробязі нагадваюць рэтрафотаздымкі. Сярод улюбёных сюжэтаў – куточкі маладзечанскага краю, асабліва звязаныя з Янкам Купалам (пейзажы “Вязынка”, “Яхімоўшчына”) і Максімам Багдановічам (“Ракуцёўшчына”).
Адкрыла выстаўку генеральны дырэктар Нацыянальнай бібліятэкі Беларусі Аксана Кніжнікава. Яна павітала гасцей і пажадала аўтару натхнення ў творчасці.
Сваімі ўражаннямі падзялілася першы намеснік старшыні Беларускага саюза мастакоў, мастацтвазнаўца Наталля Шаранговіч. Павіншавалі аўтара з адкрыццём экспазіцыі яго сябры і калегі – намеснік дырэктара па вучэбнай рабоце Гімназіі-каледжа мастацтваў г. Маладзечна Святлана Цар; мастак, член Беларускага саюза мастакоў, загадчык мастацкага аддзялення гімназіі-каледжа Мікалай Аўчыннікаў і мастак, член Беларускага саюза мастакоў, заслужаны дзеяч мастацтваў Рэспублікі Беларусь Васіль Касцючэнка.
Запрашаем наведвальнікаў адпачыць душой на хвалях аўтарскай інтэрпрэтацыі і фантазіі, атрымаць асалоду ад вытанчанага мастацтва віцебскай акварэльнай школы і выйсці за межы рэальнасці ў прастору мастацкай гармоніі.
Экспазіцыя будзе працаваць да 23 мая 2023 года.
Дата заканчэння яе працы можа быць зменена.
Уваход – па чытацкім білеце або білеце сацыякультурнага цэнтра.
Час работы выстаўкі адпавядае рэжыму работы бібліятэкі.
Тэлефон для даведак: (8 017) 368 37 37.
Матэрыял пададзены аддзелам сувязей з грамадскасцю.