У рамках праекта “На хвалі часу, у плыні жыцця” Нацыянальная бібліятэка алічбоўвае кнігі маладнякоўцаў. У межах святкавання 135-годдзя з дня нараджэння Змітрака Бядулі плануецца алічбоўка ўсіх яго першых выданняў. Асноўная частка кніг ужо размешчана анлайн. На чарзе аповесць “Салавей”, выдадзеная Беларускім дзяржаўным выдавецтвам у 1929 годзе.
На працягу 2021 года бібліятэка актыўна святкуе юбілей Змітрака Бядулі. Ужо прайшлі такія мерапрыемствы, як семінар “Шляхамі маладнякоўцаў”: да 135-годдзя Змітрака Бядулі (1886–1941) і 120-годдзя Міхася Зарэцкага (1901–1937), круглы стол “Беларускі салавей”, дзе ўдзельнічаў ганаровы госць – сын Змітрака Бядулі Яўхім Плаўнік. А 1 кастрычніка распачынаецца літаратурны конкурс “Беларускі салавей”, для ўдзелу ў якім неабходна напісаць эсэ па адным з чатырох прапанаваных твораў пісьменніка, сярод якіх ёсць і “Салавей”.
Упершыню аповесць “Салавей” была апублікавана на старонках часопіса “Узвышша” ў 1926–1927 гадах і прынесла поспех яе аўтару. У 1928-м выйшла першае выданне аповесці ў зборніку твораў, а ў наступным годзе была апублікавана кніга “Салавей: раман”. Гэты твор заняў выбітнае месца ў творчасці пісьменніка. У аповесці ўзнімаецца тэма прыгоннага права, што стала ўкладам аўтара ў станаўленне жанру гістарычнай прозы. Вобраз галоўнага героя, таленавітага юнака Сымона, – прыклад адважнага селяніна, барацьбіта за свае правы. Твор нясе глыбокую псіхалагічную і сацыяльную ідэю. Свет “Салаўя” ў чымсьці рамантычны і казачны, бо разлічаны на моладзевую аўдыторыю.
У Нацыянальнай бібліятэцы захоўваецца выданне аповесці “Салавей” 1929 года, апублікаванае ў серыі “Мастацкае слова – масам”. У хуткім часе яно будзе алічбавана і даступна чытачам у межах праекта “На хвалі часу, у плыні жыцця”.
Для таго каб ажывіць у памяці гэты твор, мы падрыхтавалі тэст, які складаецца з 14 заданняў, дзе неабходна адгадаць аднаго з герояў аповесці па яго прамове альбо аўтарскім апісанні.
Паспрабуйце свае сілы!
Матэрыял пададзены інфармацыйна-аналітычным аддзелам.
