З 1 па 30 чэрвеня 2009 года ў зале беларускай літаратуры (пам. 205) праходзіць выстаўка «Зямное неба паэта», прысвечаная 70-годдзю з дня нараджэння Уладзіміра Максімавіча Скарынкіна, паэта і перакладчыка.
Асноўная тэматыка твораў У. Скарынкіна – апаленае вайной дзяцінства, адважнасць і гераізм беларускага народа ў гады ваеннага ліхалецця, любоў да працы і бацькоўскай зямлі, мінулае і сучаснасць роднага краю. У аўтара ёсць свая «крылатая» тэма, звязаная з яго ранейшымі прафесійнымі буднямі, – рамантыка блакітнага неба, мужнасць людзей, лёсам заручаных з авіяцыяй. Творы паэта вызначаюцца абвостраным, жывым пачуццем грамадзянскасці, шчырасцю і ўсхваляванасцю.
Літаратурная спадчына У. Скарынкіна прадстаўлена на выстаўцы зборнікамі лірыкі, сярод якіх «Буслы над аэрадромам» (1969), «Гукавы бар'ер» (1972), «Дазвольце ўзлёт» (1975), «Чацвёрты разварот» (1979), «Вугал атакі» (1982), «Пасадачныя агні» (1985), «Выратавальны плыт» (1988), «Размова на парозе» (1991), «Лосвіда» (1993), «Апошняе слова» (1994) і іншыя, а таксама выданнямі для дзяцей – кнігамі вершаў, скорагаворак і казак «Канікулярная ангіна» (1991) і «Падарожжа ў Крайшарад» (1997), фантастычна-прыгодніцкім апавяданнем «У карэце па белым свеце» (2000).
Асобны раздзел экспазіцыі змяшчае пераклады, зробленыя У. Скарынкіным. На беларускую мову ён пераклаў паэму Дантэ «Боская камедыя» (1997, Нацыянальная прэмія Італіі 1998; Дзяржаўная прэмія Беларусі імя Я. Купалы 2000), перастварыў на беларускай мове, як адзначае аўтар, паэмы Дж. Байрана, змешчаныя ў зборніку «Прароцтва Дантэ; Дон-Жуан» (2004). На выстаўцы прадстаўлены пераклады вершаў М. Рубцова, М. Вінграноўскага і інш.
Дапаўняюць экспазіцыю публікацыі твораў аўтара ў розных зборніках і часопісах.
Кантактны тэлефон: 293-27-16.