З 28 жніўня па 29 кастрычніка ў зале прававой інфармацыі (пам. 207в) праходзіць выстаўка “ЗША: грамадства, дзяржава, права”, прымеркаваная да 230-годдзя прыняцця Канстытуцыі Злучаных Штатаў Амерыкі.
Прыняцце Канстытуцыі ЗША – гэта вынік барацьбы за незалежнасць англійскіх калоній у Паўночнай Амерыцы. Цалкам тэкст асноўнага закона дзяржавы, адобранага Кангрэсам Канфедэрацыі, быў гатовы да 17 верасня 1787 г. Мэтай Канстытуцыі стала юрыдычнае афармленне новай дзяржавы – Злучаных Штатаў Амерыкі.
Канстытуцыя ЗША – параўнальна кароткі дакумент. У ім змяшчаецца прыблізна 7 тыс. слоў. Структурна Канстытуцыя на сённяшні дзень уключае прэамбулу, сем артыкулаў і дваццаць сем паправак. Дакумент адносіцца да ліку “жорсткіх”, паколькі змяняецца ў больш складаным парадку, чым звычайныя законы: за час дзеяння нарматыўнага прававога акта былі прынятыя і ўступілі ў сілу толькі 27 паправак.
Першыя дзесяць з іх неафіцыйна называюцца Білем аб правах, які замацаваў найважнейшыя правы і свабоды чалавека, што практычна адсутнічалі ў першапачатковым тэксце Канстытуцыі. Наступныя папраўкі тычыліся пытанняў выбарчага права, расавага і нацыянальнага раўнапраўя грамадзян, пераемнасці ўлады ў выпадку датэрміновага спынення паўнамоцтваў прэзідэнта, асобных пытанняў правасуддзя і г.д.
У адрозненне ад канстытуцыйнай практыкі большасці іншых краін, папраўкі, прынятыя да Канстытуцыі ЗША, не ўключаюцца непасрэдна ў яе тэкст, а публікуюцца дадаткова да яго.
Cкладаная працэдура ўнясення паправак абумовіла таксама адсутнасць у ёй многіх інстытутаў, якія сталі ў цяперашні час традыцыйнымі ў агульнасусветнай практыцы канстытуцыяналізму, такіх як кампетэнцыя Вярхоўнага суда пры ажыццяўленні канстытуцыйнага кантролю, асновы прававога статусу палітычных партый, сацыяльныя правы грамадзян і інш. У сілу гэтага канстытуцыйныя прабелы папаўняюцца актамі Кангрэса і прэзідэнта, канстытуцыйнымі звычаямі, традыцыямі, судовымі прэцэдэнтамі.
Канстытуцыя ЗША – выдатны палітыка-прававы акт, які значна паўплываў на канстытуцыі многіх краін свету і паклаў пачатак сучаснаму разуменню канстытуцыі як у матэрыяльным, так і ў фармальным сэнсе.
Экспазіцыя налічвае больш за 100 дакументаў: кніг, брашур, перыядычных выданняў, аўтарэфератаў дысертацый на рускай і англійскай мовах.
Выстаўка будзе цікавая студэнтам, выкладчыкам, аспірантам, юрыстам міжнародных кампаній, работнікам арганізацый, якія маюць дачыненне да амерыканскай юстыцыі, а таксама ўсім, хто цікавіцца амерыканскім правам.
Выстаўка ўключае наступныя тэматычныя раздзелы:
- Канстытуцыя Злучаных Штатаў Амерыкі: гісторыя і сучаснасць
- Прэзідэнцкая ўлада ў ЗША і яе прадстаўнікі
- Прававая сістэма Злучаных Штатаў Амерыкі
- Вярхоўны суд ЗША: судовая прававая палітыка
- Выбарчая сістэма Амерыкі
- Амерыканскае крымінальнае права
- Асновы крымінальнага працэсу ЗША
Кантактны тэлефон: (8 017) 293 27 28.
Карысныя спасылкі:
Інфармацыйны цэнтр Амбасады ЗША (IRC)