З 1 па 30 верасня 2008 года ў зале беларускай літаратуры (пам. 205) праходзіць юбілейная выстаўка “Жывое думак хараство”, прысвечаная 70-годдзю з дня нараджэння Анатоля Сямёнавіча Грачанікава (1938 – 1991), беларускага паэта, лаўрэата Дзяржаўнай прэміі Беларусі (1984) і прэміі Ленінскага камсамола Беларусі (1974).
А. Грачанікаў – адзін з цікавых і самабытных паэтаў пасляваеннага пакалення, чый год і ўзрост, як адзначаў А. Твардоўскі, “нясе галоўную службу” ў беларускай паэзіі. На прынцыпах народнай маралі – шчырасці, дабрыні, спагадзе – заснавана творчасць беларускага паэта, аўтара кніг для дарослых і дзяцей.
Выстаўка складаецца з шасці раздзелаў.
У двух першых раздзелах экспазіцыі, якія маюць назвы “У пошуках гармоніі жыццёвай” і “Па праву шчырасці”, прадстаўлены асобныя творы аўтара, якія ўвайшлі ў зборнікі: “Магістраль” (1964), “Круглая плошча” (1971), “Грыбная пара” (1973), “Начная змена” (1975), “Дрэва на выспе” (1977), а таксама кніга выбранай лірыкі “Калі далёка ты…” (1979). Сапраўдным узлётам творчасці паэта стаў зборнік вершаў і паэм “Палессе” (1983). Пасля выйшлі кнігі паэзіі: “Верасень” (1984), “Я вас люблю” (1986). Апошні прыжыццёвы зборнік “Жнівень-45” (1990) змяшчае творы, якімі паэт адгукнуўся на пачатак перабудовы і чарнобыльскую бяду.
Працягваюць экспазіцыю раздзелы: “Творы А. Грачанікава ў перакладах” і “Любіў людзей, зямлю і неба”. У іх паэт прадстаўлены ў якасці перакладчыка, публіцыста, дзіцячага пісьменніка. А. Грачанікаў перакладаў на беларускую мову творы рускіх, украінскіх, малдаўскіх, літоўскіх паэтаў, а таксама пісьменнікаў замежных славянскіх краін. Разам з Э. Агняцвет ён пераклаў зборнік паэзіі народнай паэтэсы Узбекістана Зульфіі “Такое сэрца ў мяне”. Для дзяцей пераклаў вершы сучасных афганскіх паэтаў, якія ўвайшлі ў зборнік “Ватан – значыць Радзіма”. У сваю чаргу творы А. Грачанікава перакладаліся на многія мовы свету і знайшлі сваіх прыхільнікаў у Англіі, Францыі, Польшчы, Балгарыі, В’етнаме і іншых краінах.
Многія лірычныя творы паэта пакладзены на музыку. Гэта адлюстравана ў раздзеле “Да сэрцаў людскіх”.
Апошні раздзел выстаўкі “Сын Палескага краю” распавядае пра жыццё і творчасць пісьменніка.
На выстаўцы прадстаўлена звыш 80 выданняў (кнігі, часопісы).
Кантактны тэлефон: 293-27-16.