Жывапіс раскрыжаванай душы

З 17 лютага па 13 сакавіка ў зале выяўленчых і відэадакументаў (пам. 307) праходзіць выстаўка “Жывапіс раскрыжаванай душы”, прысвечаная 90-годдзю з дня нараджэння беларускага жывапісца, народнага мастака СССР і Беларусі М. А. Савіцкага (1922–2010).

Лаўрэат Дзяржаўных прэмій СССР і Беларусі, акадэмік Акадэміі мастацтваў Расіі, акадэмік Нацыянальнай акадэміі навук Беларусі, лаўрэат ордэна Францыска Скарыны, Герой Беларусі Міхаіл Андрэевіч Савіцкі – адзін з самых вядомых жывапісцаў нашай краіны. Яго работы захоўваюцца ў шматлікіх музеях свету. Для беларускага народа М. Савіцкі больш чым мастак, ён адзін з тых, хто ўвасабляе сумленне нашай нацыі. Творчасць майстра шматгранная. Яго творы адлюстроўваюць глыбокае пранікненне ў сутнасць з’яў мінулага і сучаснасці, у кожнай з якіх ён шукаў і знаходзіў глыбокі філасофскі сэнс.

Вялікую частку мастацкай спадчыны М. Савіцкага складаюць работы, прысвечаныя Вялікай Айчыннай вайне. У іх аснове – асабіста перажытае, бо мастак сам быў удзельнікам вайны і вязнем канцлагераў. Рэпрадукцыі знакамітых палотнаў “Партызаны”, “Партызанская Мадонна”, “Мадонна Біркенау” і іншых, а таксама серыі “Лічбы на сэрцы” склалі цэнтральны раздзел экспазіцыі.

У творчасці М. Саіцкага знайшла адлюстраванне і такая трагічная тэма, як Чарнобыль. На выстаўцы прадстаўлены рэпрадукцыі работ з серыі “Чорная быль”, у якіх мастак расказвае пра людскія пакуты і боль страт, чалавечую безвыходнасць, неабходнасць берагчы жыццё ад нашай жа няўважлівасці і нядбайнасці.

Пра шматграннасць творчасці М. Савіцкага сведчаць палотны, прысвечаныя мірнай працы, у якіх паказана прыгажосць чалавека ў паўсядзённых справах. Рэпрадукцыі палотнаў “Хлеб”, “У полі”, “Ураджай” і іншыя, прадстаўленыя ў экспазіцыі, набліжаюць кожнага з нас да разумення працы як асновы асноў быцця.

Значнае месца ў творчасці мастака займаюць партрэты, кожны з якіх адзначаны філасофскім пранікненнем у глыбінную сутнасць чалавека. Экспазіцыя знаёміць наведвальнікаў з рэпрадукцыямі партрэтаў Я. Купалы, А. Пушкіна, Ф. Дастаеўскага, У. Высоцкага і інш.

На выстаўцы прадстаўлена больш за 80 дакументаў: кнігі, часопісы, паштоўкі, плакаты і рэпрадукцыі карцін мастака.

Экспазіцыя разлічана на ўсе катэгорыі чытачоў, якія цікавяцца творчасцю М. Савіцкага, а таксама гісторыяй беларускага жывапісу другой паловы XX ст.

Кантактны тэлефон: 293-27-58.