З 2 чэрвеня да 19 ліпеня ў Нацыянальнай бібліятэцы Беларусі (3-ці паверх, кальцавы калідор) дэманструецца кніжная выстаўка “Жывапіс без межаў”, прысвечаная сучаснаму мастацтву і яго вытокам.
Выстаўка арганізавана напярэдадні адкрыцця II Мінскай міжнароднай біенале сучаснага жывапісу “Colorfest”.
Мастацтва заўсёды было сучасным. Скульптуры Радэна або работы Іераніма Босха ў свой час, верагодна, выклікалі не менш спрэчак і крытыкі, чым інсталяцыі і смелыя праекты майстроў XXI стагоддзя.
Пошук новых сродкаў для адлюстравання хутка зменлівых адносін у грамадстве, эканоміцы, навуцы і тэхніцы выклікае зараджэнне мноства выяўленчых стыляў і напрамкаў, якія раптоўна з’яўляюцца, знікаюць і ўзнаўляюцца ў змененым выглядзе. Адкрывае экспазіцыю раздзел “Стылі і напрамкі”, дзе сабраны энцыклапедыі, слоўнікі, альбомы і навукова-папулярныя выданні па тыпалогіі жывапісу XX–XXI стст.
Частка экспазіцыі пад назвай “Міжнароднае жывапіснае мастацтва” знаёміць з сучаснымі жывапісцамі свету. Слова “міжнароднае” ў назве невыпадковае. Бывае цяжка вызначыць прыналежнасць таго ці іншага мастака да адной краіны, як і да якога-небудзь аднаго напрамку. Граніцы для творцаў размытыя, умоўныя або іх не існуе зусім. І ўсё ж у раздзеле дэманструюцца выданні прадстаўнікоў сучаснага жывапісу з 18 краін, сярод якіх Германія, Італія, Кітай, Польшча, ЗША і інш.
Пастаянныя наведвальнікі галерэйна-выставачнага комплексу Нацыянальнай бібліятэкі Беларусі неаднаразова мелі магчымасць бачыць майстэрства беларускіх мастакоў у арыгіналах. Яркія каталогі і альбомы айчынных майстроў, іх творчыя біяграфіі, апісанне асобных работ, звесткі пра айчынныя арт-праекты прадстаўлены ў раздзеле “Жывапіс Беларусі”.
Акунуцца ў цудоўны свет жывапісу, навучыцца яго лепш разумець і адчуваць, стаць максімальна да яго талерантным, а таксама выражаць свае эмоцыі ўжо ва ўласных карцінах дапамогуць выданні раздзела “Адчуванне мастацтва”. Наведвальнікам прапанавана кніжная серыя “Библиотека художника”, кнігі “Арт-класс” і “Исцеление через искусство”, рад іншых выданняў, якія дадуць магчымасць звычайнаму чалавеку далучыцца да высокага мастацтва.
Экспазіцыя прызначана мастацтвазнаўцам, культуролагам, студэнтам гуманітарных спецыяльнасцей, а таксама ўсім, хто цікавіцца сучасным мастацтвам.
Кантактныя тэлефоны: 293-28-86, 293-29-80.
Увага! У чытальных залах арганізаваны доступ да поўных спісаў літаратуры, прадстаўленай на ўсіх кніжных выстаўках, якія ладзяцца ў бібліятэцы.