З 2 сакавіка па 14 красавіка ў зале беларускай літаратуры (пам. 205) праходзіць выстаўка “Жанчыны ў гісторыі Беларусі”, прымеркаваная да Дня жанчын і прысвечаная лепшай палове чалавецтва.
Пачынаецца экспазіцыя з раздзела “Славутыя постаці мінуўшчыны”.
На працягу шматвяковай гісторыі многія жанчыны пакінулі сваімі справамі значны, непаўторны след на зямлі. У кожнай з іх было рознае жыццё. Рознае было і ў жыцці. Часы, калі яны жылі, іх погляды, характары, паводзіны непадобныя паміж сабой. Адны з іх нарадзіліся і дзейнічалі на беларускай зямлі, другія па волі лёсу трапілі ў іншыя краіны і праславіліся там, трэція – чужаземкі, якія былі выданы замуж за жыхароў нашай зямлі і знайшлі тут сваю радзіму. Гэтыя жанчыны – правіцельніцы, палітыкі, ваяўніцы, дзеячы навукі і культуры, асветніцы, літаратары, музыканты, мастачкі, актрысы і проста каханыя.
Папярэднія эпохі падарылі гісторыі нямала выдатных жаночых імёнаў. І гэта не толькі аб’екты кахання ды пакланення славутых мужчын, але і асобы, якія нараўне з прадстаўнікамі моцнага полу ўплывалі на ход гістарычных падзей, дапамагалі чалавецтву спасцігаць вышэйшую Боскую мудрасць, будавалі храмы веры і навукі, стваралі, захоўвалі, абаранялі Прыгажосць. Сярод іх – свабодалюбівая полацкая князёўна Рагнеда; першая на беларускай зямлі жанчына, што ўступіла на шырокую дарогу асветніцтва, – Ефрасіння Полацкая; беларуская праваслаўная святая Соф’я Слуцкая; нясвіжская княгіня Францішка Уршуля Радзівіл – першая жанчына-драматург у Вялікім Княстве Літоўскім; Апалонія Дарэўская – прыгонная танцоўшчыца, якая стаяла ля вытокаў беларускага балета; польская каралева Барбара Радзівіл; авантурная спадарожніца з Навагрудка Саламея Рэгіна Русецкая; каралева, рэфарматар, палітык Бона Сфорца і інш.
У раздзеле “Жаночае аблічча сучаснай Беларусі” прадстаўлены матэрыялы, якія расказваюць пра жыццё, навуковыя і творчыя дасягненні нашых знакамітых суайчынніц. У іх ліку – С. Станюта, В. Новак, Н. Кубасава, Р. Баравікова, В. Іпатава, Т. Бондар, М. Захарэвіч, Н. Гайда, Г. Гарэлава, Н. Шчасная, А. Паслядовіч, В. Корбут, Ю. Несцярэнка і інш.
Кантактны тэлефон: 293-27-16.