З 30 сакавіка па 14 красавіка ў аддзеле абслугоўвання афіцыйнымі дакументамі (пам. 207) адкрыта тэматычная кніжная выстаўка "Здаровы лад жыцця: міжнародны і нацыянальны вопыт", прысвечаная Сусветнаму дню здароўя.
Гэты дзень быў зацверджаны на першай сесіі Сусветнай асамблеі аховы здароўя ў 1948 г. і штогод, пачынаючы з 1950 г., адзначаецца 7 красавіка.
Кожны год выбіраецца тэма Сусветнага дня здароўя, якая асвятляе адну з прыярытэтных задач у галіне аховы здароўя. Сусветны дзень здароўя – 2010 будзе прысвечаны праблеме ўрбанізацыі і здароўя. Гэтая тэма была выбрана як знак прызнання ўздзеяння, якое ўрбанізацыя аказвае на наша агульнае здароўе ў цэлым і на здароўе кожнага з нас паасобку. Урбанізацыя – гэта неабарачальная тэндэнцыя, якая стала неад’емнай прыметай таго свету, у якім мы жывем. Хуткі прырост колькасці гарадскога насельніцтва стане адным з найважнейшых пытанняў аховы здароўя ў XXI стагоддзі, паколькі больш за палову насельніцтва зямнога шара сёння пражывае ў гарадах. Урбанізацыя асацыіруецца са шматлікімі праблемамі для здароўя, звязанымі з забруджваннем вады і навакольнага асяроддзя, насіллем і траўмамі, такімі фактарамі рызыкі, як курэнне, няправільнае харчаванне, адсутнасць фізічнай актыўнасці, шкоднае ўжыванне алкаголю, а таксама небяспекай, звязанай з успышкамі хвароб.
Сусветны дзень здароўя прадстаўляе ўнікальную магчымасць сканцэнтраваць увагу сусветнай супольнасці на праблемах сістэмы аховы здароўя і пытаннях здароўя людзей і схіліць урады, міжнародныя арганізацыі, дзелавыя кругі і грамадзянскую супольнасць да сумесных намаганняў, скіраваных на рашэнне гэтых праблем.
Адна з глабальных мэт Сусветнага дня здароўя – інтэграваць гэты Дзень ва ўстойлівую міжнародную стратэгію развіцця аховы здароўя праз серыю рэгулярных мерапрыемстваў, якія праводзяцца на мясцовым, нацыянальным або рэгіянальным узроўнях. Паспяховая рэалізацыя гэтай стратэгіі ўжо дае станоўчыя вынікі. У большасці рэгіёнаў свету павялічваецца працягласць жыцця, зніжаецца дзіцячая смяротнасць, а небяспечныя хваробы знаходзяцца пад кантролем, паколькі ўсё больш людзей атрымліваюць доступ да асноўных паслуг па ахове здароўя, імунізацыі, доступ да чыстай пітной вады і водазабеспячэння.
Арганізацыя Аб’яднаных Нацый адыгрывае вялікую ролю ў дасягненні многіх з гэтых рэзультатаў, забяспечваючы падтрымку паслуг па ахове здароўя, пастаўку асноўных медыкаментаў, аздараўленне гарадоў, аказанне медыцынскай дапамогі ў надзвычайных сітуацыях і барацьбу з інфекцыйнымі захворваннямі.
Міжурадавай структурай ААН, прызначанай каардынаваць міжнароднае супрацоўніцтва ў галіне аховы здароўя і глабальныя дзеянні па барацьбе з хваробамі, з’яўляецца Сусветная арганізацыя аховы здароўя (СААЗ), якая ставіць сваёй мэтай дасягненне высокага ўзроўню здароўя для ўсіх, забеспячэнне рэпрадуктыўнага здароўя, садзейнічанне здароваму ладу жыцця ў чыстым асяроддзі.
Рэспубліка Беларусь з’яўляецца адной з краін – заснавальніц СААЗ і актыўна ўдзельнічае ў працы гэтай арганізацыі. Супрацоўніцтва з СААЗ дазваляе нашай дзяржаве, выкарыстоўваючы сусветны вопыт, забяспечыць найбольш спрыяльныя ўмовы для ўдасканалення работы сістэмы аховы здароўя Беларусі. Здароўе – вышэйшая каштоўнасць для кожнага чалавека і нацыянальны прыярытэт нашай рэспублікі. Стварэнне неабходных умоў для захавання і ўмацавання здароўя грамадзян з’яўляецца адной з асноўных задач нашай дзяржавы.
Экспазіцыя ўключае наступныя тэматычныя раздзелы:
- міжнародныя рэкамендацыі і стандарты ў галіне аховы здароўя;
- ахова здароўя грамадзян у Рэспубліцы Беларусь, супрацоўніцтва рэспублікі з СААЗ;
- урбанізацыя і здароўе;
- здароўе маці і дзіцяці;
- барацьба з інфекцыйнымі хваробамі і ВІЧ/СНІДам;
- вада, санітарыя і гігіена;
- палітыка ў галіне здаровага ладу жыцця і медыкаментаў.
На выстаўцы прадстаўлена больш за 100 дакументаў: кнігі, брашуры, перыядычныя выданні, мімеаграфаваныя матэрыялы. Значную частку выстаўкі складаюць дакументы міжнародных арганізацый (ААН, СААЗ, ЮНЕСКА, Еўрапейскага саюза, Савета Еўропы) на рускай, французскай і англійскай мовах.
Выстаўка будзе карысная спецыялістам у галіне аховы здароўя, медыцынскім работнікам, навуковым супрацоўнікам, выкладчыкам, студэнтам вышэйшых навучальных устаноў, а таксама ўсім, хто цікавіцца праблемамі аховы здароўя і пытаннямі здаровага ладу жыцця.
Спасылкі на сайты сістэмы ААН
ААН
Сусветная арганізацыя аховы здароўя
- Сусветны дзень здароўя
- Global Atlas of the Health Workforce
- WHO and the Millennium Development Goals
Панамерыканская арганізацыя аховы здароўя
ЮНФПА
ЮНІСЕФ
Група Сусветнага банка
- Health, Nutrition and Population
- High-Level Forum on the Health MDGs (сумесна з СААЗ і Сусветным банкам)