З 16 жніўня па 14 верасня зала беларускай літаратуры (пам. 205) праводзіць тэматычную кніжную выстаўку “Здабылі славу сабе і Радзіму праславілі. Імёны знакамітых беларусаў на карце свету”.
Героямі выстаўкі з’яўляюцца ўраджэнцы Беларусі, якія ў пошуках сябе, лепшай долі ці па іншых абставінах у розныя гістарычныя часы апынуліся за межамі Бацькаўшчыны, дзе змаглі раскрыць свой талент і набылі сусветную вядомасць у палітыцы, навуцы, мастацтве. Сярод іх – першадрукары і асветнікі, вучоныя і дзеячы культуры, военачальнікі і дзяржаўныя дзеячы, паэты і кампазітары, спартсмены. Сваёй працай і талентам яны пакінулі ў гісторыі чалавецтва значны след, зрабілі ўклад у развіццё навуковай думкі, культуры, адукацыі. У розныя часы яны неслі і нясуць у свет лепшыя традыцыі беларускай зямлі: талерантнасць і патрыятызм, духоўнасць і асветніцтва.
Прапанаваная выстаўка знаёміць з літаратурай пра нашых сусветна вядомых землякоў. Наведвальнікі маюць магчымасць пазнаёміцца з іх біяграфіямі і дасягненнямі.
Экспазіцыя ўключае некалькі раздзелаў. У першым – “Галерэя слаўных імён” – сабраны агульныя выданні, прысвечаныя знакамітым беларусам, а таксама асобныя працы, аўтары якіх цікавіліся гэтай тэмай.
На беларускай зямлі пачыналіся шляхі многіх знакамітых гістарычных асоб: мысліцеляў, палкаводцаў, палітыкаў, грамадскіх дзеячаў. Кожны з іх зрабіў важкі ўклад у дыпламатыю, гісторыю і палітыку розных краін. Выданні, прысвечаныя гэтым людзям, прадстаўлены ў раздзеле “Славутыя імёны гісторыі і палітыкі”.
Раздзел “Рыцары навукі з беларускай зямлі” знаёміць з біяграфіямі і творчымі дасягненнямі сусветна вядомых вучоных – ураджэнцаў Беларусі.
Пра выдатных сыноў Беларусі – адважных падарожнікаў, неўтаймаваных вучоных, геолагаў і географаў, біёлагаў і медыкаў, этнографаў і лінгвістаў, якія здзяйснялі навуковыя адкрыцці, вывучалі жыццё, мову, культуру тых народаў, сярод якіх ім даводзілася жыць, раскажуць матэрыялы раздзела “Пашыралі межы сусвету”.
Аб тым, што беларуская зямля дала свету шэраг выдатных дзеячаў культуры – жывапісцаў, літаратараў, музыкантаў, скульптараў, мастацтвазнаўцаў, – сведчыць раздзел “Ураджэнцы Беларусі ў сусветнай культуры”.
Праца і талент нашых знакамітых землякоў і сёння не страцілі значэння і заслугоўваюць увагі і пашаны суайчыннікаў.
Кантактны тэлефон: 293-27-16.