З 16 мая 2008 года ў Нацыянальнай бібліятэцы Беларусі адкрыта тэматычная выстаўка «Застылыя імгненні», прымеркаваная да Міжнароднага дня музеяў.
18 мая музейныя работнікі ўсяго свету адзначаюць сваё прафесійнае свята.
Міжнародны дзень музеяў з’явіўся ў календары ў 1977 годзе, калі на чарговым пасяджэнні ICOM (International Council of Museums – Міжнародны савет музеяў) была прынята прапанова савецкай дэлегацыі аб зацвярджэнні гэтага свята. З 1978 года гэты дзень адзначаецца штогод больш як у 150 краінах.
Прынята лічыць, што праз музеі грамадства выяўляе сваё стаўленне да гісторыка-культурнай спадчыны, і з гэтым цяжка не пагадзіцца. Збіраючы і захоўваючы помнікі матэрыяльнай і духоўнай культуры, яны вядуць вялікую навукова-асветную і адукацыйна-выхаваўчую працу.
Мерапрыемствы, прысвечаныя гэтай даце, павінны прыцягнуць увагу грамадскасці і сродкаў масавай інфармацыі да музейнай справы і лёсу гісторыка-культурных каштоўнасцяў. Гэта праблема асабліва актуальна і для Беларусі. Бо ад абсалютнай большасці найбагацейшых старажытных музеяў (а першыя музейныя калекцыі з’явіліся ў нас яшчэ ў XVI стагоддзі) сёння ў рэспубліцы засталіся толькі асобныя экспанаты. Частка музейных каштоўнасцяў знішчыла вайна, іншыя ж аселі ў музейных фондах Расіі і Украіны, Польшчы і Літвы, Германіі і іншых краін. У Беларусі прынята Праграма развіцця музейнай справы на 2006 – 2010 гады, у адпаведнасці з якой плануецца рэканструяваць 53 музейныя будынкі, камп’ютэрызаваць сістэму ўліку музейных фондаў, стварыць адзіны Дзяржаўны каталог Музейнага фонду Рэспублікі Беларусь, а таксама адкрыць 24 новыя музеі.
На выстаўцы сабраны кнігі, якія расказваюць аб гісторыі зараджэння музейнай справы і ўключаюць звесткі аб музейна-экскурсійным патэнцыяле краін свету, утрымліваюць аналіз некаторых тыпаў музеяў, разглядаюць асобныя калекцыі і музейныя зборы. Асобны раздзел выстаўкі прысвечаны музеям Беларусі, асноўныя напрамкі ў дзейнасці якіх вызначае Закон Рэспублікі Беларусь "Об охране историко-культурного наследия Республики Беларусь".
Экспазіцыя размешчана на 3-м паверсе кальцавога калідора.
Кантактны тэлефон 293-28-86.
 |
 |
 |
 |
 |
 |
