З 4 жніўня па 15 верасня ў зале беларускай літаратуры (пам. 205) праходзіць выстаўка “Залатыя кросны душы”, прысвечаная 100-годдзю з дня нараджэння народнага пісьменніка Беларусі Янкі Брыля (1917–2006).
Многія творы Янкі (Івана Антонавіча) Брыля – беларускага пісьменніка, перакладчыка, публіцыста – сёння сталі хрэстаматыйнымі. Іх вывучаюць і школьнікі, і студэнты вышэйшых навучальных устаноў. У беларускай прозе яго творы вызначылі, а па сутнасці, стварылі вельмі яркую і глыбокую плынь. Ім характэрны лірызм і роздум, публіцыстычная завостранасць і гумар, схільнасць да філасофскіх абагульненняў. Стылю празаіка ўласціва паэтычнасць бачання свету, сплаўленая з тонкім псіхалагізмам і пластычнасцю малюнка. У сваіх творах Янка Брыль даследуе чалавека, які апынуўся ў складаных сацыяльна-псіхалагічных абставінах.
Багацце вобразаў, створаных Брылём, а таксама літаратурны партрэт самога пісьменніка раскрываюць выданні першага раздзела “На рацэ часу”. На паліцах – зборы твораў, выбраныя творы, асобныя кнігі прозы. Літаратурная спадчына ў экспазіцыі прадстаўлена раманам, аповесцямі, апавяданнямі, эсэ, нарысамі, лірыка-філасофскімі мініяцюрамі, псіхалагічнымі абразкамі. Сярод экспанатаў – “Птушкі і гнёзды”, “У Забалоцці днее”, “Жменя сонечных промняў”, “Золак, убачаны здалёк”, “Я з вогненнай вёскі…”, “Парастак”, “Вячэрняе” і інш.
Наведвальнікам выстаўкі цікава будзе даведацца, што першай літаратурнай спробай будучага пісьменніка былі вершы, якія друкаваліся ў часопісе “Шлях моладзі”. Цікава і тое, што Іван Антонавіч займаўся перакладамі, пісаў для дзяцей.
Другі раздзел называецца “Самім сабою быць”. У ім сабраны энцыклапедычныя даведнікі, дзе адлюстраваныя асноўныя этапы жыцця і творчай дзейнасці Я. Брыля. Таксама тут можна азнаёміцца з успамінамі і літаратуразнаўчымі даследаваннямі, прысвечанымі жыццю і творчасці пісьменніка. Прыцягне ўвагу публікацыя “Мой радавод”, у якой разам з цікавым матэрыялам прадстаўлены шэраг здымкаў з сямейнага архіва пісьменніка, якія друкуюцца ўпершыню.
Выстаўка разлічана на шырокае кола чытачоў.
Кантактны тэлефон: (8 017) 293 27 16.