З 22 верасня па 31 кастрычніка ў зале беларускай літаратуры (пам. 205) праходзіць выстаўка “Заклінальнік слова”, прымеркаваная да 90-годдзя з дня нараджэння беларускага паэта і перакладчыка Навума Зіноўевіча Кісліка (1925–1998).
Плеяда паэтаў нашай рэспублікі шматлікая і рознагалосая. У хоры іх выразна чуюцца і галасы тых, хто піша на рускай мове. Працу над уласнымі творамі яны, як правіла, спалучаюць з перакладамі паэзіі сваіх беларускіх пабрацімаў. Такое добрае спалучэнне характарызуе і творчую дзейнасць Навума Кісліка.
Літаратурная спадчына пісьменніка на выстаўцы прадстаўлена кнігамі выбраных вершаў, паэм і перакладаў “Избранное” (1975) і “Лестница лет” (1985), кнігамі паэзіі “Разговор с друзьями” (1956), “Поиск” (1959), “Позывные земли” (1961), “Повесть о прессованном порохе” (1964), “Ветви” (1969), “Праздник снегопада” (1972), “Воспоминание о вокзалах” (1976), “Сентябрьская река” (1978), “Первоснежье” (1980), “Разные годы” (1984), “Зимний свет” (1985), дзе асноўныя матывы яго паэзіі – лірычнае адлюстраванне лёсу і духоўных набыткаў ваеннага ліхалецця. Творы Навума Кісліка прадстаўлены і шматлікімі публікацыямі ў часопісах і калектыўных зборніках.
Цікавай для наведвальнікаў выстаўкі будзе і кніга Навума Кісліка “Памяти патефона” (1995). У яе ўвайшлі вершы паэта апошніх гадоў і вершы, якія публікаваліся, але былі моцна зменены ў свой час цэнзурай. Яны адноўлены ў першапачатковым выглядзе. У кнізе прадстаўлены і тыя творы, што зусім не маглі быць надрукаваны ў ранейшыя часы.
Навум Кіслік – адзін з нястомных папулярызатараў беларускай літаратуры на рускай мове. Дзякуючы яму па-руску загучалі Я. Купала, А. Куляшоў, П. Панчанка, Р. Барадулін, А. Вялюгін, А. Русецкі... Ён пераклаў на рускую мову раманы І. Мележа “Людзі на балоце” (1964), У. Караткевіча “Хрыстос прызямліўся ў Гародні” (1966), аповесць А. Карпюка “Данута” (1963). З гэтымі, а таксама іншымі перакладамі, якія ўвайшлі ў зборнік “Спелый бор” (1982), можна пазнаёміцца пад час правядзення выстаўкі.
Асобным раздзелам у экспазіцыі прадстаўлены матэрыялы пра жыццёвы і творчы шлях Навума Кісліка, успаміны яго сяброў і калег. Выстаўка налічвае больш за 100 выданняў і багата аздоблена фотаздымкамі.
Кантактны тэлефон: 8 (017) 293 27 16.