З 4 лютага па 4 сакавіка ў аддзеле абслугоўвання афіцыйнымі дакументамі (пам.207) адкрыта выстаўка “Захаванне біяразнастайнасці: міжнародны вопыт, нацыянальная стратэгія”.
Выстаўка прысвечана Міжнароднаму году біяразнастайнасці.
2010 год был абвешчаны Міжнародным годам біяразнастайнасці 20 снежня 2006 г. на 61 сесіі Генеральнай Асамблеі ААН (рэзалюцыя 61/203). Прыняцце гэтай рэзалюцыі мела мэтай прыцягнуць ўвагу сусветнага супольніцтва да праблемы страты біяразнастайнасці. Асамблея заклікала захоўваць і рацыянальна выкарыстоўваць прыроду нашай планеты і аб’яднаць намаганні ў справе зберажэння яе экасістэм і абароны асабліва цэнных аб’ектаў прыроды.
Празмернае выкарыстанне прэснай вады, энергетычных рэсурсаў, масавая вырубка лесу, сучасныя метады вядзення сельскай гаспадаркі і іншыя віды дзейнасці чалавека аказваюць разбуральны ўплыў на навакольнае асяроддзе, прыводзяць да скарачэння біялагічнай разнастайнасці. На сённяшні дзень пад пагрозай знікнення знаходзяцца больш чым 7 тысяч відаў жывёл і амаль 60 тысяч відаў раслін. На Зямлі засталося крыху больш за 55 % першапачатковага ляснога покрыва, знішчана амаль 10 % каралавых рыфаў. Глабальныя змены ў атмасферы, такія як разбурэнне азонавага слоя і змяненне клімату, толькі дадаюць праблеме вастрыні. Амаль 60 % экасістэм планеты ўжо не ў стане выконваць у поўным аб’ёме экалагічныя функцыі, ад якіх залежыць наша існаванне.
19 снежня 2008 года Генеральная Асамблея ААН прыняла яшчэ адзін дакумент (рэзалюцыя 63/219), у якім заклікала ўсе дзяржавы-члены выканаць іх абавязкі па значным зніжэнні к 2010 г. тэмпаў страты біяразнастайнасці. Асамблея рэкамендавала ўсім дзяржавам стварыць для правядзення Міжнароднага года біяразнастайнасці нацыянальныя камітэты і прапанавала міжнародным арганізацыям прыняць актыўны ўдзел у правядзенні Года.
Каардынатарам Міжнароднага года біяразнастайнасці прызначаны сакратарыят Канвенцыі аб біялагічнай разнастайнасці. Адкрытая для падпісання на Канферэнцыі па навакольным асяроддзі і развіцці ў 1992 г. у Рыо-дэ-Жанейра Канвенцыя аб біялагічнай разнастайнасці (КБР) з’яўляецца міжнароднай дамовай ў галіне захавання і рацыянальнага выкарыстання запасаў біяразнастайнасці. Канвенцыю падпісалі 193 бакі, што дазваляе гаварыць пра яе амаль універсальны характар.
У Рэспубліцы Беларусь Канвенцыя ратыфікавана Пастановай Вярхоўнага Савета Рэспублікі Беларусь ад 10.06.1993 г. № 2358–XII “Аб ратыфікацыі Канвенцыі аб біялагічнай разнастайнасці”. Наша дзяржава разумее важнасць аб’яднання міжнародных намаганняў у рашэнні глабальна значных экалагічных праблем свету. Перспектыўныя прыярытэтныя напрамкі па выкананні Канвенцыі вызначаны ў “Нацыянальнай стратэгіі і плане дзеянняў па захаванні і ўстойлівым выкарыстанні біялагічнай разнастайнасці Рэспублікі Беларусь”.
На выстаўцы прадстаўлена больш за 100 дакументаў на рускай, англійскай, французскай і нямецкай мовах. Большую частку экспазіцыі складаюць дакументы міжнародных арганізацый: кнігі, брашуры, мімеаграфаваныя матэрыялы ААН, перыядычныя выданні, буклеты.
Экспазіцыя ўключае наступныя тэматычныя раздзелы:
- біялагічная разнастайнасць і ўстойлівае развіццё;
- міжнародныя прававыя дакументы па захаванні біяразнастайнасці і навакольнага асяроддзя;
- міжнароднае і рэгіянальнае супрацоўніцтва і ўзаемадзеянне ў галіне захавання біялагічнай разнастайнасці;
- нацыянальныя стратэгіі аховы біялагічнай разнастайнасці і ўстойлівага выкарыстання біялагічных рэсурсаў;
- ахова біялагічнай разнастайнасці ў Рэспубліцы Беларусь;
- змены клімату і біялагічная разнастайнасць;
- захаванне біялагічнай разнастайнасці відаў флоры і фауны, якія знікаюць.
Выстаўка будзе цікавай прадстаўнікам біялагічных і геаграфічных спецыяльнасцей, спецыялістам у галіне прыродакарыстання і аховы навакольнага асяроддзя, студэнтам, аспірантам, навуковым работнікам, а таксама ўсім, хто цікавіцца праблемай захавання біялагічнай разнастайнасці нашай планеты.
Карысныя спасылкі
Дакументы
- Канвенцыя аб біялагічнай разнастайнасці (1992)
- Рэзалюцыі Генеральнай Асамблеі
- Даклады і запіскі Генеральнага сакратара
- Канвенцыя па барацьбе з апустыньваннем у тых краінах, якія спазналі сур’ёзную засуху і/ці апустыньванне, асабліва ў Афрыцы (1994)
- Пагадненне Арганізацыі Аб’яднаных Нацый аб захаванні трансгранічных рыбных запасаў і запасаў далёка мігруючых рыб і кіраванні імі (1995)
- Базельская канвенцыя аб кантролі над трансгранічнай перавозкай небяспечных адходаў і іх знішчэннем (1989)
- Бонская канвенцыя па захаванні відаў дзікіх жывёл, якія мігруюць (1979)
- Канвенцыя аб трансгранічным забруджванні паветра на вялікіх адлегласцях (1979)
- Канвенцыя аб міжнародным гандлі відамі дзікай флоры і фауны, якія знаходзяцца пад пагрозай знікнення (1973 год)
- Захаванне біялагічнай разнастайнасці (Раздзел 15 Парадку дня на XXI ст.)
- Пекінская заява аб барацьбе з апустыньваннем і спрыянні ўстойліваму развіццю і даклад Міжнароднай канферэнцыі па барацьбе з апустыньваннем (Пекін, 22–24 студзеня 2008 г.)
- Дэкларацыі па навакольным асяроддзі
- Канвенцыі і пагадненні па навакольным асяроддзі
Дадатковыя рэсурсы
- 2010 год – Міжнародны год біяразнастайнасці
- Біялагічная разнастайнасць і ўстойлівае развіццё
- Дзейнасць ААН па біялагічнай разнастайнасці
- 60 напрамкаў дзейнасці ААН
- Міжнародны дзень біялагіченай разнастайнасці (22 мая)
- Сусветны дзень навакольнага асяроддзя (5 чэрвеня)
- Віды дзікай прыроды, якія знікаюць
- Празмерны вылаў рыбы: пагроза біялагічнай разнастайнасці марскога асяроддзя
- Факты пра пустыні і апустыньванне
- Карэнныя народы і навакольнае асяроддзе
- Змяненне клімату
- Праграма ААН па навакольным асяроддзі