З 15 сакавіка па 9 красавіка ў зале беларускай літаратуры (пам. 205) праходзіць выстаўка “Зачараваны роднай мовай”, прымеркаваная да 90-годдзя з дня нараджэння беларускага мовазнаўца Міхаіла Станіслававіча Яўневіча (1922–2010).
Заслужаны настаўнік Беларусі (1972), лаўрэат Дзяржаўнай прэміі Беларусі (1990) М.С. Яўневіч належыць да плеяды навукоўцаў, якія ўсё жыццё прысвяцілі роднаму слову і пакінулі вельмі прыкметны след у беларускім мовазнаўстве. Больш за паўстагоддзя праца вучонага была звязана з сярэдняй школай і вышэйшай навучальнай установай, выхаваннем і навучаннем маладога пакалення. Ён – адзін з першых у рэспубліцы – узнагароджаны медалём Францыска Скарыны (1992) за вялікую грамадскую, навуковую і педагагічную дзейнасць у галіне беларускай навукі і культуры.
На выстаўцы прадстаўлены шматлікія навуковыя працы М.С. Яўневіча, пераважна па сінтаксісе сучаснай беларускай мовы, праблемах сінтаксічнай сінанімікі. Сярод іх – манаграфія “Сінтаксічная сінаніміка ў сучаснай беларускай літаратурнай мове” (1977), у якой упершыню на багатым фактычным матэрыяле даследавана сістэма сінанімічных сродкаў выражэння прасторавых адносін. Працягваюць экспазіцыю артыкулы аўтара, змешчаныя ў калектыўных зборніках і часопісах.
М.С. Яўневіч – суаўтар і навуковы рэдактар шэрагу вучэбных дапаможнікаў і праграм для студэнтаў-філолагаў: “Сінтаксіс сучаснай беларускай мовы” (1969), “Сучасная беларуская літаратурная мова. Лексікалогія. Фанетыка. Арфаграфія” (1993), “Сучасная беларуская літаратурная мова. Марфалогія” (1997), “Курсавыя працы па беларускай мове” (1990), “Беларуская мова” (1991),”Беларуская мова: дапаможнік для абітурыентаў” ( 1998), “Сучасная беларуская мова: кантрольныя працы” (2000). Гэтыя і іншыя выданні прадстаўлены ў экспазіцыі.
Асобнае месца на выстаўцы займаюць школьныя падручнікі “Беларуская мова” для вучняў 5–9 класаў школ з беларускай і рускай мовамі навучання (1963–1995), напісаныя М.С. Яўневічам у суаўтарстве з У.К. Андрэенкам, па якіх больш за трыццаць гадоў школьнікі нашай краіны вывучалі родную мову.
Завяршаюць экспазіцыю матэрыялы пра жыццё і дзейнасць таленавітага вучонага.
Кантактны тэлефон: 293-27-16.
 |
 |
 |
 |
 |
 |
