З 1 красавіка па 20 мая 2008 года ў зале беларускай літаратуры (пам. 205) праходзіць выстаўка «З вышыні перажытага», прысвечаная 75-годдзю з дня нараджэння Віктара Мікалаевіча Шымука, беларускага паэта-песенніка, празаіка, нарысіста, перакладчыка.
Вершам В. Шымука ўласціва надзённасць тэматыкі, праўдзівасць адлюстравання духоўнага свету нашага сучасніка, шчырасць інтанацыі.
У экспазіцыі прадстаўлены: першая кніга паэта – паэма пра юнага героя-партызана Колю Гойшыка «Каля Броннай гары» (1960); зборнікі вершаў для дзяцей «Мы вясне дапамагалі» (1962) і «Дочкі сіняга Нёмана» (1964); паэтычныя зборнікі «Свіцязанскія хвалі» (1968), «Світанне» (1972), «Святло красавіцкіх бяроз» (1983), «Спелы жнівень» (1990).
Лірызм твораў паэта прыцягнуў увагу кампазітараў, якія напісалі шмат песень на яго вершы. Да творчасці В. Шымука звярталіся кампазітары В. Іваноў, І. Кузняцоў, М. Пятрэнка, К. Цесакоў, П. Шыдлоўскі і іншыя. Сярод прадстаўленых твораў – «Зецельская старонка» (1997) – зборнік песень Пётра Русава на вершы Віктара Шымука.
Вынікам працы пісьменніка ў празаічным жанры сталі зборнік апавяданняў «Помняць пушчы і паляны» (1969), нарысы «Добрай раніцы, поле!» (1964), «Сын каваля» ( 1970 ), «Леў Даватар» (1973) , «Пасля працы рупнай» (1974) і іншыя. Гэтыя выданні таксама можна ўбачыць на выставачных паліцах. Усяго на выстаўцы прадстаўлена каля 50 дакументаў.
Кантактны тэлефон 293-27-16.
 |
 |
 |
