23 верасня ў рамках фестывалю японскай культуры “Японская восень у Беларусі” ў бібліятэцы прайшоў ХІІ штогадовы Рэспубліканскі конкурс на лепшае вуснае выступленне на японскай мове.
Мерапрыемства арганізавана Пасольствам Японіі ў Рэспубліцы Беларусь сумесна з Нацыянальнай бібліятэкай Беларусі і Беларускай асацыяцыяй выкладчыкаў японскай мовы.
Сёлета фестываль адзначаны важнай юбілейнай датай у гісторыі японска-беларускіх адносін – 200-годдзем з дня нараджэння Іосіфа Гашкевіча, ураджэнца Беларусі, першага расійскага консула ў Японіі і аўтара першага ў свеце поўнага японска-рускага слоўніка.
З нагоды ўрачыстай даты ў Нацыянальнай бібліятэцы Беларусі (3-ці паверх, кальцавы калідор) адкрылася мабільная выстаўка “Японія: традыцыі і культура”, якая падрыхтавана пасольствам Японіі і будзе працаваць да 18 кастрычніка. Выстаўка суправаджаецца кніжнай экспазіцыяй, дзе прадстаўлена каля 100 выданняў па японскай тэматыцы з фонду Нацыянальнай бібліятэкі. Асобнае месца ў экспазіцыі займаюць выданні пра Іосіфа Гашкевіча.
Выступаючы з прывітальным словам перад канкурсантамі і гасцямі выстаўкі, пасол Японіі ў Рэспубліцы Беларусь Сігэхіра Міморы ўручыў дырэктару Нацыянальнай бібліятэкі Беларусі Раману Матульскаму рускую азбуку, выдадзеную пад кіраўніцтвам Іосіфа Гашкевіча, і кнігі японскіх коміксаў манга пра трагедыю Хірасімы.
“Мне вельмі прыемна, што Нацыянальная бібліятэка Беларусі была выбрана для правядзення такога цікавага мерапрыемства. Радуе, што, нягледзячы на далёкае геаграфічнае месцазнаходжанне, мы падтрымліваем цёплыя дружалюбныя сувязі”, – адзначыў Раман Матульскі.
У конкурсе японскай мовы ўзялі ўдзел восем канкурсантаў, кожны з якіх падрыхтаваў для прысутных выступленне на японскай мове. Усім удзельнікам Сігэхіра Міморы ўручыў памятныя падарункі. Аднак конкурс – гэта далёка не адзіны праект фестывалю. З верасня па лістапад 2014 года ў Беларусі пройдзе мноства мерапрыемстваў, якія пазнаёмяць зацікаўленых людзей з традыцыйнай і сучаснай японскай культурай: выстаўкі, канцэрты, кінапаказы, лекцыі і майстар-класы, прэзентацыі і конкурсы.
Тэлефон для даведак: (8 017) 293 27 56.
Е-mail: pr@nlb.by