З 20 сакавіка па 13 красавіка 2009 года ў зале выяўленчых і відэадакументаў (пам. 307) праходзіць кніжна-ілюстрацыйная выстаўка “Яго называлі мастак-рыцар”, прысвечаная Антонісу Ван Дэйку (1599–1641).
Выстаўка прымеркавана да 410-годдзя з дня нараджэння фламандскага жывапісца і графіка, майстра прыдворнага партрэта.
Ван Дэйк быў мастаком шырокага дыяпазону i тварыў у розных жанрах. Яму належаць шматлікія карціны на рэлігійныя і міфалагічныя сюжэты, а таксама серыя афортаў, што выяўляюць яго знакамітых сучаснікаў.
Аднак галоўным укладам майстра ў гісторыю сусветнага мастацтва стаў яго партрэтны жывапіс, поўны прыгажосці і адухоўленасці. Ван Дэйк напісаў сотні палотнаў і стаў адным са стваральнікаў параднага партрэта ХVII стагоддзя. Яго творчасць спрыяла заснаванню школы выдатных англійскіх партрэтыстаў ХVIII стагоддзя і ў значнай ступені паўплывала на развіццё партрэтнага жывапісу Еўропы.
На выстаўцы экспануюцца альбомы і кнігі канца ХIХ ─ пачатку ХХI стагоддзя, а таксама артыкулы, паштоўкі і рэпрадукцыі работ знакамітага мастака.
Экспазіцыя разлічана на ўсіх чытачоў, якія цікавяцца творчасцю аднаго з найярчэйшых прадстаўнікоў фламандскага мастацтва.
Кантактны тэлефон: 293-27-53.
