З 16 красавіка па 12 мая 2009 года ў Нацыянальнай бібліятэцы праходзіць кніжна-ілюстрацыйная выстаўка “Я пакіну вам усмешку”, прысвечаная 120-годдзю з дня нараджэння Чарльза Спенсера Чапліна (1889–1977).
Чарлі Чаплін – адзін з найвялікшых камедыйных акцёраў свету, рэжысёр, сцэнарыст, прадзюсер і кампазітар. Яго заўсёды называюць у ліку найбуйнейшых майстроў сусветнага кіно.
За дзесяцігоддзі творчай дзейнасці ім былі створаны такія знакамітыя фільмы, як “Малы”, “Залатая ліхаманка”, “Агні вялікага горада”, “Новыя часы”, “Вялікі дыктатар” і многія іншыя.
Чарлі Чаплін атрымаў мноства прэмій і ўзнагарод, сярод якіх Міжнародная прэмія Міру (1954), спецыяльны “Оскар” (1972), Залаты прыз Міжнароднага кінафестывалю ў Венецыі (1972). За выдатныя заслугі ў сусветнай кінематаграфіі яму быў уручаны ордэн Ганаровага легіёна (1971).
У экспазіцыі прадстаўлены матэрыялы па біяграфіі і творчай дзейнасці знакамітага майстра нямога кіно: альбомы, кнігі, артыкулы, рэпрадукцыі і фотаздымкі.
Экспазіцыя разлічана на ўсе катэгорыі чытачоў, якія цікавяцца гісторыяй нямога кіно, а таксама жыццём і творчасцю Чарльза Чапліна.
З экспанатамі выстаўкі можна пазнаёміцца ў зале выяўленчых дакументаў Нацыянальнай бібліятэкі Беларусі (пам. 307).
Кантактны тэлефон: 293-27-58.
 |
 |
 |
 |
 |
 |
