З 9 па 28 лютага ў зале нотных і аўдыявізуальных дакументаў (пам. 305) праходзіць выстаўка, прысвечаная 100-годдзю з дня нараджэння беларускага кампазітара і педагога Эдзі Майсееўны Тырманд.
Ураджэнка сталіцы Польшчы Варшавы Эдзі Тырманд (1917–2008) скончыла харавы факультэт Варшаўскай кансерваторыі (1938), Беларускую дзяржаўную кансерваторыю па класе фартэпіяна – у прафесара Г.І. Шаршэўскага (1949) і па класе кампазіцыі – у прафесара А.В. Багатырова (1952) і была першай жанчынай-кампазітарам, якая ўступіла ў Саюз кампазітараў БССР (1954).
Эдзі Майсееўна Тырманд – мастак з ярка індывідуальным почыркам. У аснове яе шматжанравай творчасці – камернасць у спалучэнні з рамантычнай экспрэсіяй і вытанчаным лірызмам. “Гукавы свет” яе сачыненняў насычаны пявучасцю.
Да найбольш значных твораў кампазітара можна аднесці кантаты, два канцэрты для фартэпіяна з аркестрам, тры санаты і Такату для фартэпіяна, мноства інструментальных п’ес, хоры. Вакальныя цыклы на вершы М. Багдановіча, М. Танка, Б. Дадзье, Г. Лоркі занялі годнае месца ў канцэртнай і педагагічнай практыцы Эдзі Майсееўны. Багаты свет дзіцячай музыкі кампазітара. Ёю створаны сюіты і цыклы мініяцюр для фартэпіяна, складаныя хоры а капэла і простыя двухгалосныя песні для дзіцячых калектываў.
Педагагічная дзейнасць Э.М. Тырманд – важкі складнік беларускай музычнай педагогікі. У методыцы яе выкладання ўсё было падпарадкавана раскрыццю мастацкага боку твора, яе інтэрпрэтацыі заўсёды былі насычаны жывымі чалавечымі пачуццямі. У аснове заняткаў ляжала імкненне выхаваць сапраўдных і высокапрафесійных музыкантаў. Сярод яе выпускнікоў – заслужаная артыстка РБ дацэнт Л.С. Таўкачова, прафесар А.Б. Каржанеўская, дацэнт С.Б. Аколава.
На выстаўцы прадстаўлены камерна-інструментальныя сачыненні (санаты для скрыпкі і фартэпіяна, п’есы на тэмы беларускіх народных песень і танцаў, п’есы для ансамбля народных інструментаў, фартэпіянныя мініяцюры) і вакальна-харавая творчасць кампазітара (цыклы, песні і хоры з суправаджэннем і а капэла). Наведвальнікі маюць магчымасць праслухаць аўдыязапісы твораў Эдзі Тырманд, у тым ліку хоры “Вечар”, “Зімовая дарога”, “Восень” і інш. у выкананні Нацыянальнага дзяржаўнага хору тэлерадыёкампаніі Беларусі.
Дапаўняюць экспазіцыю артыкулы і кнігі пра творчасць юбіляра.
Кантактны тэлефон: (8 017) 293 27 52.